រំលងបានមួយសប្តាហ៍ទៀតហើយ តន្ត្រី KIZZ Concert នឹងចូលខ្លួនមកបម្រើអារម្មណ៍ទស្សនិកជនសារជាថ្មី ដោយមានវត្តមានតារាចម្រៀងល្បីៗជាច្រើនដួង រួមទាំងក្រុមរាំពិសេស CA Star ថែមទៀតផង។ ដូចទស្សនិកជនធ្លាប់បានស្គាល់មកហើយ ក្រុមរាំ CA Star គឺជាក្រុមរាំមួយ ដែលតែងតែបង្ហាញជូនទស្សនិកជន នូវក្បាច់រាំថ្មីៗ រស់រវើក មួយក្បាច់ៗ ពោរពេញទៅដោយថាពល និងភាពប៉ិនប្រសប់។ ពីតន្ត្រី KIZZ Concert នៅសប្តាហ៍នេះក្រុម CA Star នឹងមានក្បាច់ថ្មីទៀតហើយសម្រាប់ទស្សនិកជន។ 

រីឯវត្តមានតារាចម្រៀងដែលនឹងបង្ហាញវត្តមាន មានជាក្រុមក៏មាន មានច្រៀងទោលក៏មាន តារាទាំងនោះរួមមាន ក្រុវ RIZER Band កញ្ញា មាស នីតា និងអ្នកនាង វីរៈនិច្ច។ តារាចម្រៀងទាំងនេះនឹងនាំយកនូវបទចម្រៀងពីរោះៗ សុទ្ធសឹងតែជាបទដែលទទួលបានការគាំទ្រពីទស្សនិកជន។ 

អ្វីដែលកាន់តែពិសេសទៀតនោះ តន្ត្រី KIZZ Concert ក៏នៅតែបើកឱកាសអោយអ្នកទស្សនាដែលមានទេពកោសល្យសិល្បៈ មកបង្ហាញសមត្ថភាពផងដែរ។ រៀងរាល់ខែនឹងមានបេក្ខភាពមកបង្ហាញសមត្ថភាពហើយមានឱកាសច្រៀងរួមគ្នាដោយផ្ទាល់ជាមួយតារាចម្រៀងអាជីព។ ចំពោះការប្រកាសស្វែងរកនិងជ្រើសរើសបេក្ខភាពមានសមត្ថភាពនឹងធ្វើឡើងតាមរយៈផ្ញើវីដេអូឃ្លីបសម្តែងរបស់សាម៉ីខ្លួនចូលមកប្រអប់សារទំព័រហ្វេសប៊ុក PNN TV Cambodia និងទំព័រហ្វេសប៊ុក KIZZ។  រៀងរាល់ខែក្រុមការងារផលិតកម្មវិធីនឹងជ្រើសយកបេក្ខភាព ៥ រូប ដើម្បីដាក់អោយបោះឆ្នោតតាមរយៈការបង្ហោះឃ្លីបវីដេអូទាំង៥ នៅលើផេក PNN TV Cambodia ។ បេក្ខភាព ដែលមានការគាំទ្រខ្លាំងជាងគេបំផុត ១រូប ក្នុងចំណោម៥រូប នឹងត្រូវជ្រើសអោយមានឱកាសច្រៀងដោយផ្ទាល់ក្នុងកម្មវិធីប្រគំតន្រ្តី KIZZ Concert ។ KIZZ Concert ផ្សាយផ្ទាល់រៀងរាល់ ថ្ងៃសុក្រ វេលាម៉ោង ១១:០០ ថ្ងៃត្រង់ ដល់ ម៉ោង ១រសៀល នៅលើកញ្ចក់ ទូរទស្សន៍ PNN និង លើហ្វេសប៊ុកផេក KIZZ៕

ដោយ៖ ម៉ី វ៉ាន់ណែត