រឿង បក្សីជាប់ទ្រុងមាស សាច់រឿងនិយាយពីគ្រួសារបែងចែកវណ្ណៈ នឹងមានចាក់ផ្សាយនៅលើកញ្ចក់ទូរទស្សន៍ភីអិនអិន!!!

នៅយប់នេះទស្សនិកជននឹងបានទស្សនាជាមួយរឿងភាគថៃថ្មីមួយទៀតដែលមានចំណងជើងថា បក្សីជាប់ទ្រុងមាស។ រឿងមួយនេះរៀបរាប់ពីជីវិតដែលមានឪពុកជាអ្នកមាន ប៉ុន្តែមានម្តាយជាទាសករ។ នីម គឺជាកូនស្រីបង្កើតរបស់លោក សយហ្វា ដែលជាសេដ្ឋីនៅក្នុងភូមិគ្រឹះស៊ុផារ៉េត និងមានម្តាយជាស្រីបម្រើនៅក្នុងភូមិគ្រឹះនោះ។ ម្តាយរបស់នីមគឺជាប្រពន្ធចុង និងជាអ្នកបម្រើ ទើបធ្វើអោយអ្នកដែលនៅក្នុងផ្ទះទាំងអស់គ្មានអ្នកណាកោតក្រែងពីរនាក់ម្តាយ និងកូននេះឡើយ។ គ្រប់គ្នា តែងតែមើលងាយ និងអោយតម្លៃនីមត្រឹមតែជាកូនអ្នកបម្រើ មិនបានអោយតម្លៃជាកូនសេដ្ឋីទេ។ នីម មានប្អូនស្រីម្នាក់ ឈ្មោះសៃហ្វា ជាកូនប្រពន្ធដើម។ ព្រោះតែសៃហ្វាជាកូនប្រពន្ធដើម ទើបគ្រប់គ្នា លើកកម្កើង និងគោរពនាងគ្រប់ៗគ្នា។ 

នីម និង សៃហ្វា បានស្រឡាញ់បុរសតែមួយ ទើបធ្វើអោយអ្នកទាំងពីរមានជម្លោះនឹងគ្នា ព្រោះតែបែបនេះ ទើបធ្វើអោយនីម តែងតែត្រូវរងនូវទណ្ឌកម្មឥតឈប់ឈរ។ រឿង បក្សីជាប់ទ្រុងមាស ចូលរួមសម្តែងដោយតារាសម្តែងល្បីៗដូចជា យ៉ាដា សម្តែងជាតួនាង នីម, ផុន សម្តែងជាតួ ផាត់, ទូន សម្តែងជាតួ សយហ្វា, មីន សម្តែងជាតួ ភព រួមនឹងតារាសម្តែងជើងចាស់ ជើងថ្មីជាច្រើនរូបទៀត។  រឿង បក្សីជាប់ទ្រុងមាស ផ្តើមចាក់ផ្សាយចាប់ពីថ្ងៃអង្គារ ទី៨ ខែតុលា ឆ្នាំ២០២៤ វេលាម៉ោង ៩យប់នេះ តទៅហើយ នៅលើកញ្ចក់ទូរទស្សន៍ភីអិនអិន៕