ការប្រកួត GANZBERG Kun Khmer Super Strike របស់ ស្ថានីយ៍ទូរទស្សន៍ PNN នាចុងសប្ដាហ៍ថ្ងៃអាទិត្យ ទី៦ ខែតុលា ឆ្នាំ២០២៤នេះ កាន់តែពិសេសកក្រើកទ្វេដងជាមួយនឹងកីឡាករគុនខ្មែរល្បីៗលំដាប់ប្រទេស និងកីឡាករជើងខ្លាំងគ្រប់ទិសទី ចំពោះការប្រកួតប្រដាល់គុនខ្មែររបស់ ទូរទស្សន៍ភីអិនអិន បានសម្រិតសម្រាំងគូជក់ចិត្តចំនួនប្រាំគូ ក្នុងនោះផងដែងមានការប្រកួតលក្ខណៈមិត្តភាពអន្តរជាតិដ៏កក្រើកចំនួនពីរគូ និងការប្រកួតគុនខ្មែរប៉ះគុនខ្មែរចំនួនបីគូបន្ថែមទៀត។
 
អ្នកប្រដាល់រាជធានីយភ្នំពេញរហស្សនាមមេទ័ពធំបក្សីស្លាបដែក សូត្រ ប៊ុនធី នឹងត្រូវជួបជើងខ្លាំងមកពីអ៊ីរ៉ង់ ម៉ូសេន ហ្វាថត ដែលអ្នកទាំងពីរណាត់គ្នាលើប្រភេទទម្ងន់ ៦៣.៥គីឡូក្រាម រីឯការប្រកួតអន្តរជាតិមួយគូទៀតគឺជាការចួបគ្នារវាងជើងខ្លាំងទម្ងន់ស្រាល ធន់ ស៊ីហុង និងជើងខ្លាំងមកពីប្រទេសថៃ ប៉េបស៊ី ឆ.គៀតវីណា អ្នកទាំងពីរបានណាត់ប្រកួតគ្នាក្នុងប្រភេទទម្ងន់ ៥៧គីឡូក្រាម។ សូមបញ្ជាក់ថា ចំពោះការប្រកួតមិត្តភាពអន្តរជាតិទាំងពីរគូខាងលើនេះប្រព្រឹត្តទៅលើលក្ខន្តិកៈគុនខ្មែរប្រាំទឹក ក្នុងមួយទឹកមានរយៈពេលបីនាទី។

ក្រៅពីគូអន្តរជាតិដ៏ជក់ចិត្តខាងលើនេះ PNN ក៏បានផ្ដល់ឳកាសដល់កីឡាករ គុនខ្មែរជំនាន់ក្រោយពោរពេញដោយសមត្ថភាពចំនួនបីគូផ្សេងទៀតដូចជា ជិន ថាងប្រកួតសងសឹកជាមួយ ខុន សីហា ខណៈដែលឡៅ រចនាត្រូវប៉ះ ធន់ សុវណ្ណស្កាយ រីឯប៉ែនកាក់ ធារ៉ា ត្រូវចួបសងសឹកជាមួយ ជ័យ សុវណ្ណ។

សូមប្រិយមិត្តចូលរួមធ្វើជាសាក្សីនៃការប្រកួតដ៏កក្រើកអស្ចារ្យនេះ ដោយចូលរួមទស្សនាដោយសេរីឱ្យបានច្រើនកុះករនៅសង្វៀន PNN ព្រែកព្នៅ ដែលការប្រកួតចាប់ផ្ដើម និងផ្សាយផ្ទាល់ចាប់ពីវេលាម៉ោង ១រសៀលតទៅ នៅលើកញ្ចក់ ទូរទស្សន៍ ភីអិនអិន, ហ្វេសបុកផេក PNN Sports និងហ្វេសបុក Beer Ganzberg។ សម្រាប់បងប្អូនដែលទស្សនាតាមទូរស័ព្ទដៃសូមកុំភ្លេចស៊ែចែករំលែកផងណាដើម្បីចែករម្លែកការប្រកួតគុនខ្មែររបស់យើងទៅកាន់ពិភពលោកឱ្យពិភពលោកកាន់តែស្គាល់ថែមទៀត។

ដោយ៖ ក្រុមកាងារកីឡាPNN