រឿងភាគខ្មែរ ហេតុអ្វីជាពួកយើង? នៅយប់នេះនឹងធ្វើអោយទស្សនិកជនកាន់តែជក់ចិត្តទៀតហើយជាមួយវគ្គពិសេស ដែលលីនដាពិតប្រាកដបានបង្ហាញខ្លួនហើយ ប៉ុន្តែត្រូវប្តូរមុខមាត់ថ្មីទាំងអស់។ សូមរំលឹកថយក្រោយពីរឿងនេះបន្តិច មូលហេតុដែលធ្វើអោយលីនដាពិតប្រាកដត្រូវត្រឡប់មកវិញជាមួយមុខមាត់ថ្មីនេះ ព្រោះតែលីដាត្រូវជួបនឹងឧបទ្ទវហេតុបើរថយន្តធ្លាក់ជ្រោះ បណ្តាលអោយខូចមុខមាត់យ៉ាងដំណំ។ ឆ្លៀតពេលដែលលីនដាពិតប្រាកដកំពុងតែសម្រាកព្យាបាលនៅមន្ទីរពេទ្យ ក៏មានលីនដាក្លែងក្លាយបង្ហាញខ្លួន ដោយមានការរៀបចំពីជនទីបីដែលរហូតមកដល់ពេលនេះនៅមិនទាន់បង្ហាញមុខមាត់នៅឡើយ។ 

ក្រោយពេលលីនដាបានវះកាត់កែសម្ភស្សថ្មី នាងក៏បានចូលមកបម្រើកាងារនៅក្រុមហ៊ុនប៉ារបស់នាង ដោយបានប្តូរឈ្មោះទៅជារីកា និងមានតួនាទីធ្វើជាលេខារបស់ម៉ៃឃើ។ វត្តមានរបស់រីកាធ្វើអោយគ្រប់គ្នាសង្ស័យថា នាងចូលមកបម្រើកាងារធ្វើជាលេខារបស់ម៉ៃឃើ ព្រោះតែចង់តោងម៉ៃឃើ។ រឿងនេះបានធ្វើអោយលីនដា មានការខឹងសម្បារជាខ្លាំង និងបានស្នើអោយម៉ៃឃើដករីកាចេញថែមទៀតផង ប៉ុន្តែម៉ៃឃើមិនព្រមព្រោះគ្មានហេតុផលអីដែលត្រូវដករីកាចេញឡើយ។ 

រឿងនេះបានធ្វើអោយលីនដា កាន់តែក្តៅក្នុងចិត្ត និងបានប៉ះសំដីគ្នាជាមួយនឹងរីកាថែមទៀតផង។ តើរវាងលីនដាពិត និងលីនដា ក្លែងក្លាយនឹងមានរឿងអ្វីកើតឡើងខ្លះ? តើរីកា ត្រូវប្រឈមនឹងលីនដាបែបណាដែរ? កុំភ្លេចរង់ចាំតាមដានទស្សនារឿង ហេតុអ្វីជាពួកយើង ចាក់ផ្សាយរៀងរាល់ថ្ងៃច័ន្ទ ដល់ថ្ងៃ ព្រហស្បតិ៍ វេលាម៉ោង ៨យប់តទៅ នៅលើកញ្ចក់ទូរទស្សន៍ភីអិនអិន៕ 

ដោយ៖ ម៉ី វ៉ាន់ណែត