នៅមុនព្រិត្តិការណ៍ធំប្រចាំខែមករា 2025 ចូលមកដល់ អ្នករៀបចំប្រកួតកីឡាប្រដាល់របស់ PNN សហការណ៍ជាមួយម្ចាស់ឧបត្ថម្ភកម្មវិធី Ganzberg ក្រោមការផ្តល់កីឡាករដោយសហព័ន្ធប្រដាល់គុនខ្មែរបានជ្រើសរើសអ្នកប្រដាល់ជាតិនិងអន្តរជាតិមកប្រកួតបើកឆាកឆ្នាំថ្មីនេះមិនធ្វើឲ្យអ្នកគាំទ្រគុនខ្មែររបស់យើងខកបំណងឡើយ។

 អ្នកប្រដាល់ ខាំ ខ្លានាង ដែលមានកណ្តាប់ដៃធ្ងន់ដូចញញួរនិងលឿនដូចជាគ្រាប់ព្រួញគឺជាបេក្ខភាពប្រកួតមិត្តភាពអន្តរជាតិជាមួយអ្នកប្រដាល់ថៃ ផេតម៉ាទ្បៃ ស៊ីតម៉ាទ្បៃថង។ ខ្លានាង បានសម្តែងនូវទឹកចិត្តដ៏ក្លៀវក្លារបស់ខ្លួនថានឹងយកជ័យជម្នះដាក់ចូលក្នុងកំណត់ត្រាដើមឆ្នាំថ្មីរបស់ខ្លួន។

គូមិត្តភាពអន្តរជាតិដែលជាគូចុងក្រោយគេនៅថ្ងៃអាទិត្យទី 5 នេះគឺជាការប៉ះគ្នារវាង សោម ពិសិដ្ឋ និងអ្នកប្រដាល់ថៃ ផេតបួខាវ ស៊ីតប៊ុនឆប។ ពិសិដ្ឋ មួយរយៈនេះកំពុងតែឡើងសមត្ថភាពពេញប្រៀបនិងមានមហិច្ឆតាយកឈ្នះលើគូប្រកួតដែលជាជាតិបរទេសជាខ្លាំង។

ក្រៅពីនេះយើងក៏មានការប្រកួតសាកកណ្តាប់ដៃរវាងអ្នកប្រដាល់ខ្មែរនិងខ្មែរចំនួន 3 គូផ្សេងទៀតដែរទីរួមមានគូពិសេសទីមួយ ធន់ ចាន់សុខ ត្រូវប៉ះជាមួយ គាង ម៉េងគ័ង គូពិសេសទីពីរ រីគី ហាសាន់ ប្រកួតជាមួយ ថេន អាទិត្យ និងគូពិសេសទីបួន ខន ទិត្យវិច្ឆិកា ត្រូវល្បងថ្វីដៃជាមួយ វិទ្ធី វិរៈ។

លោកអ្នកអាចចូលរួមទស្សនាការប្រកួត Ganzberg Kun Khmer Super Strike ដោយផ្ទាល់នៅសង្វៀន PNN ព្រែកព្នៅឬតាមរយៈការផ្សាយផ្ទាល់នៅលើទូទស្សន៍ និង Facebook page PNN រៀងរាល់ថ្ងៃអាទិត្យចាប់ពីវេលាម៉ោង 1 រសៀលតទៅ។

ដោយ៖ ក្រុមកាងារកីឡាPNN