ការប្រកួត GANZBERG Kun Khmer Super Strike របស់ ស្ថានីយ៍ទូរទស្សន៍ PNN នាចុងសប្ដាហ៍ថ្ងៃអាទិត្យ ទី១៤ ខែកក្កដា ឆ្នាំ២០២៤នេះ កាន់តែពិសេសកក្រើកទ្វេដងជាមួយនឹងកីឡាករគុនខ្មែរល្បីៗលំដាប់ប្រទេស និងកីឡាករជើងខ្លាំងគ្រប់ទិសទីចំពោះការប្រកួតប្រដាល់គុនខ្មែររបស់ ទូរទស្សន៍ភីអិនអិន បានសម្រិតសម្រាំងគូជក់ចិត្តចំនួនប្រាំគូ ក្នុងនោះផងដែងមានការប្រកួតលក្ខណៈមិត្តភាពអន្តរជាតិដ៏កក្រើកចំនួនពីរគូ និងការប្រកួតគុនខ្មែរប៉ះគុនខ្មែរចំនួនបីគូបន្ថែមទៀត។

អ្នកប្រដាល់មកពីខេត្តត្បូងឃ្មុំរហស្សនាមអធិរាជជង្គង់ ល្អចាប់ស្អិត ឡុង សំណាង នឹងត្រូវជួបជើងខ្លាំងថៃ ស៊ីងថង ស៊ីតលួងពូសួង ដែលអ្នកទាំងពីរណាត់គ្នាលើប្រភេទទម្ងន់ ៦៥គីឡូក្រាម រីឯការប្រកួតអន្តរជាតិមួយគូទៀតគឺជាការចួបគ្នារវាងជើងខ្លាំងទម្ងន់ស្រាល ប៊ុន សុធា ជាមួយដៃគូចាស់មកពីប្រទេសថៃ ថេបផាយ៉ាក់ ឌេតឌីយីម អ្នកទាំងពីរបានណាត់ប្រកួតគ្នាក្នុងប្រភេទទម្ងន់ ៥៤គីឡូក្រាម។

ចំពោះការប្រកួតមិត្តភាពអន្តរជាតិទាំងពីរគូខាងលើនេះប្រព្រឹត្តទៅលើលក្ខន្តិកៈគុនខ្មែរប្រាំទឹក ក្នុងមួយទឹកមានរយៈពេលបីនាទី។ ក្រៅពីគូអន្តរជាតិដ៏ជក់ចិត្តខាងលើនេះ PNN ក៏បានផ្ដល់ឳកាសដល់កីឡាករថ្នាលគុនខ្មែរជំនាន់ក្រោយពោរពេញដោយសមត្ថភាពចំនួនបីគូផ្សេងទៀតដូចជា ស៊ុម ខេមរា របស់ក្លឹបបញ្ជាការដ្ឋានទ័ពពិសេស ប្រកួតជាមួយ ពុយ ក្រូច របស់ក្លឹបឃ្លាំងមឿងកីឡាខេត្តពោធិ៍សាត់ រីឯ ធន់ ចាន់ណា របស់ក្លឹបកងយោធពលខេមរភូមិន្ទ ត្រូវប៉ះ ម៉ាលី សារ៉ាន របស់ក្លឹបសសុម៉ាលីគុនខ្មែរ ខណៈ លី វរៈ របស់ក្លឹបអេភូថងគុនខ្មែរ ត្រូវប៉ះ សំណាង ចុងក្រោយ របស់មេសរថ្ងកខេត្តស្វាយរៀង ។

ដែលការប្រកួតដ៏ជក់ចិត្តនេះ នឹងចាប់ផ្តើមចាប់ពីវេលាម៉ោង១រសៀលតទៅ ដោយមានការផ្សាយផ្ទាល់លើ កញ្ចក់ទូរទស្សន៍ PNN ផេកហ្វេសប៊ុក យូធូប  PNN Sports និងផេក Beer Ganzberg ។ អ្នកគាំទ្រក៏អាចអញ្ជើញចូលរួមទស្សនាផ្ទាល់ដោយសេរី នៅស្ថានីយទូរទស្សន៍ ដែលមានទីតាំងស្ថិតនៅខណ្ឌព្រែកព្នៅ រាជធានីភ្នំពេញ ៕
 

ដោយ៖ ក្រុមកាងារកីឡាPNN