ខ្សែភាពយន្តភាគថៃជាច្រើនរឿង ប្រចាំស្ថានីយទូរទស្សន៍ភីអិនអិន តែងតែឆក់យកបេះដូងទស្សនិកជន អ្នកទស្សនាឲ្យចង់តាមដានពីមួយភាគទៅមួយភាគ។ ដោយមើលឃើញសន្ទុះនៃការគាំទ្រខ្សែភាពយន្តភាគថៃ យ៉ាងច្រើនពីសំណាក់ទស្សនិកជន ភីអិនអិន ក៏នៅតែបន្តនាំយកនូវរឿងភាគថៃល្អៗ សាច់រឿងថ្មីៗ មិនថា បុរាណ ឬសម័យ មកបម្រើជូនទៅដល់ទស្សនិកជន ទស្សនាកម្សាន្តអារម្មណ៍ផងដែរ។ យ៉ាងណាមិញ សម្រាប់ចំណងដៃថ្មីមួយរឿងទៀតហើយ ដែលនឹងត្រៀមនាំយកមកបម្រើចំណីចក្ខុ ហ្វេនៗជាបន្តទៀតនាបំណាច់ឆ្នាំ ២០២៣នេះ គឺ រឿង «គ្រូពេទ្យថងឯក វគ្គ ២ » ដែលកាលពី វគ្គ ១ នោះ គឺមានការទទួលបានប្រជាប្រិយភាពខ្លាំង និងមានអ្នកទស្សនាច្រើន ។

 កំពូលរឿងភាគថៃដ៏មានប្រជាប្រិយភាពនេះ ក៏មានការសម្តែងពីតារាថៃល្បីៗ មានលោក Mario Maurer ( ម៉ារីអូ មៀរើ) ( សម្តែងជា គ្រូពេទ ថង ) និងកញ្ញា Kimberley Anne Woltemas ( សម្តែងជាតួ នាង បួរ ) និងវត្តមានតារាសម្តែងថៃល្បីៗ ជាច្រើនដួងផ្សេងទៀត។ សម្រាប់ការវិលត្រឡប់ជួបគ្នាលើកនេះ «គ្រូពេទ្យថងឯក វគ្គ ២» ដែលគ្រោងនឹងចាក់ផ្សាយនាបំណាច់ឆ្នាំ២០២៣នេះ ភីអិនអិន នឹងនាំយកនូវការភ្ញាក់ផ្អើលជូនដល់ទស្សនិកជនជា ហ្វេនៗ នៅកម្ពុជាផងដែរ។ សូម ហ្វេនៗ រង់ចាំដំណឹងល្អពី ភីអិនអិន! វិលមកសាច់រឿង «គ្រូពេទ្យថងឯក វគ្គ ២ » នេះ ទស្សនិកជន នឹងទទួលបាននូវបទពិសោធន៍ថ្មី ពីរឿងផ្ទាល់តែម្តង ដោយដំណើរសាច់រឿង ក៏មានបង្ហាញមកជាមួយនឹងប្រវត្តិសាស្ត្រ និងការរស់នៅរបស់របស់មនុស្ស ក្នុងយុគសម័យរាប់រយឆ្នំាមុន និងការប្រៀបធៀប ពីក្បួនវិជ្ជសាស្ត្ររវាង សម័យបុរាណ និងសម័យបច្ចេកវិទ្យាទំនើប។

ក្នុងកាលគ្រាមួយនោះ និស្សិតពេទ្យម្នាក់ឈ្មោះ បួរ ត្រូវបានបាតុភូតម្យ៉ាង ប្រៀបដូចជាអភិនីហារ បាននាំយកនាងវិលត្រឡប់ទៅកាន់សម័យបុរាណមួយ ក្នុងយុគស្តេច រ៉ាម៉ា ទី ៣ ។ គ្រប់យ៉ាង វាដូចជាថ្មីសម្រាប់នាង សូម្បីតែការរស់នៅ និងសង្គមក្នុងសម័យនោះ គឺខុសប្លែកគ្នា យ៉ាងខ្លាំង ហើយក្នុងពេលនោះ បួរ ក៏បានជួបនឹងគ្រូពេទ្យបុរាណម្នាក់ឈ្មោះ ថង។ បួរ និងថង តែងតែមិនចុះសម្រុងនឹងគ្នា នូវក្បួនវិជ្ជសាស្ត្រ ព្រោះតែនៅក្នុងសម័យនោះ ការព្យាបាលមនុស្ស គឺមិនដូចជា សម័យទំនើបនេះទេ។ ការប្រកួតប្រជែងគ្នា រវាងក្បួនពេទ្យបុរាណ និងវិជ្ជសាស្ត្រទំនើបរបស់ ថង និងបួរ ក៏បានប្រែក្លាយទៅទំនាក់ទំនងស្នេហាជាមួយគ្នា ហើយពួកគេបានចែករំលែកបទពិសោធន៍វិជ្ជាពេទ្យឲ្យគ្នាទៅវិញទៅមក។

យ៉ាងណាមិញ ខាងលើនេះ គ្រាន់តែជាការរៀបរាប់ត្រួសៗ ពីសាច់រឿងសង្ខេបតែប៉ុណ្ណោះ ប៉ុន្តែសម្រាប់ដំណើររឿងពីមួយភាគទៅមួយភាគទៀត គឺបានលាយបញ្ចូលជាមួយនឹងឈុតឆាក ល្អមើល ជក់ចិត្ត ចង់តាមដានហើយតាមដានទៀត។

ហ្វេនៗ ចង់ដឹងទេថា តើខ្សែភាពយន្តភាគថៃ រឿង «គ្រូពេទ្យថងឯក» នៅវគ្គ ២នេះ មានសាច់រឿង ល្អមើលយ៉ាងណានោះ សូមកុំភ្លេចរង់ចាំទស្សនាការផ្សាយជូននៅលើកញ្ចក់ទូរទស្សន៍ភីអិនអិន ក្នុងពេលឆាប់ៗនេះ៕

សូមទស្សនាវីដេអូខាងក្រោម៖

ដោយ៖ សិរីរដ្ឋ