វេទិការជជែកកម្សាន្ត និងបកស្រាយបទចម្រៀងដ៏រ៉ូមែនទិករបស់ស្ថានីយទូរទស្សន៍ zភីអិនអិន CAMBODIA LITE Station នឹងវិលមកជួបទស្សនិកជនសារជាថ្មីម្តងទៀតហើយ នៅថ្ងៃអាទិត្យ ទី១៣ ខែតុលា ឆ្នាំ២០២៤ នេះ ចាប់ពីវេលាម៉ោង ៥ ដល់ម៉ោង ៦ល្ងាច។ 

នៅសប្តាហ៍នេះ ទស្សនិកជននឹងបានជួបជាមួយនឹងវត្តមានរបស់តារាចម្រៀង ជាតន្ត្រីករ និងជាអ្នកនិពន្ធ លោក តុំ សារ៉ាដេត និងតារាចម្រៀងស្រីដែលមានសម្លេងពីរោះនិងកំពុងតែមានឈ្មោះល្បីនៅក្នុងវិស័យសិល្បៈចម្រៀងគឺ កញ្ញា សារ៉ាវីតា។ 
អ្នកទាំងពីរនឹងឡើងមកចែករំលែកនូវបទពិសោធន៍ពាក់ព័ន្ធនឹងអាជីពជាតារាចម្រៀង ជាអ្នកនិពន្ធ ទៅដល់ទស្សនិកជនបានដឹង រួមទាំងមានការជជែកកម្សាន្តបែបសប្បាយៗ ដោយមានការជីកកកាយសួរនាំពីពិធីការនីសំបូរវោហាស័ព្ទ រាងតូចច្រឡឹង កញ្ញា ពេជ្រ ចាន់ធីតា ផ្ទាល់តែម្តង។ 

មិនត្រឹមតែប៉ុណ្ណោះ លោក តុំ សារ៉ាដេត និងកញ្ញា សារ៉ាវីតា នឹងលើកយកបទចម្រៀងជាច្រើនបទមកបកស្រាយ ដោយបទចម្រៀងទាំងនោះនឹងត្រូវបកស្រាយជាមួយតន្ត្រីបែប Acoustic ផ្ទាល់តែម្តង។  កុំភ្លេចណា រង់ចាំតាមដានទស្សនាកម្មវីធី CAMBODIA LITE Station ចាក់ផ្សាយរៀងរាល់ថ្ងៃអាទិត្យ ចាប់ពីវេលាម៉ោង ៥ល្ងាច នៅលើកញ្ចក់ទូរទស្សន៍ ភីអិនអិន ៕ 
 

ដោយ៖ ម៉ី វ៉ាន់ណែត