នៅសប្តាហ៍នេះតារាចម្រៀងប្រុសស្រីល្បីៗជាច្រើនដួងនឹងចូលខ្លួនមកបកស្រាយបទចម្រៀងជាច្រើនបទលើឆាកតន្ត្រី KIZZ Concert។ តារាចម្រៀងដែលគ្រប់គ្នាទទួលស្គាល់ថាមានទឹកដមសម្លេងពីរោះ ផ្អែម ស្តាប់មិនចេះជិនណាយ អ្នកនាង ម៉េង កែវពេជ្ជតា នឹងបង្ហាញវត្តមានរួមគ្នាជាមួយនឹងតារាចម្រៀងរលកក្រោយពីរដួងគឺ លោក ព្រីន និងកញ្ញា កែវ សៀងហៃ។ 

មិនត្រឹមតែបានទស្សនាជាមួយការបកស្រាយបទចម្រៀងពីសំណាក់តារាចម្រៀងទាំងបីដួងប៉ុណ្ណោះទេ ទស្សនិកជនក៏នឹងបានទស្សនាជាមួយក្រុមកំប្លែងពូណុយ ធានាថានឹងសើចតាំងពីដើមរហូតដល់ចប់ជាមិនខានឡើយ។  ជាការពិតណាស់តន្ត្រី KIZZ Concert តែងតែអញ្ជើញតារាចម្រៀងប្រុសស្រីល្បីៗជាច្រើនដួង មកបម្រើអារម្មណ៍ទស្សនិកជន រួមទាំងបង្ហាញនូវផ្ទាំងទស្សនីយភាពថ្មីៗប្លែកៗ ដើម្បីអោយទស្សនិកជនបានប្លែកអារម្មណ៍ពីមួយសប្តាហ៍ទៅមួយសប្តាហ៍។ កុំភ្លេចរង់ចាំតាមដានទស្សនាជាមួយកម្មវីធីតន្ត្រី KIZZ Concert នៅថ្ងៃសុក្រ ទី១១ ខែតុលា ឆ្នាំ២០២៤ វេលាម៉ោង ១១ព្រឹកតទៅ នៅលើកញ្ចក់ទូរទស្សន៍ភីអិនអិន។

អ្វីដែលកាន់តែពិសេសទៀតនោះ តន្ត្រី KIZZ Concert ក៏នៅតែបើកឱកាសអោយអ្នកទស្សនាដែលមានទេពកោសល្យសិល្បៈ មកបង្ហាញសមត្ថភាពផងដែរ។ រៀងរាល់ខែនឹងមានបេក្ខភាពមកបង្ហាញសមត្ថភាពហើយមានឱកាសច្រៀងរួមគ្នាដោយផ្ទាល់ជាមួយតារាចម្រៀងអាជីព។ ចំពោះការប្រកាសស្វែងរកនិងជ្រើសរើសបេក្ខភាពមានសមត្ថភាពនឹងធ្វើឡើងតាមរយៈផ្ញើវីដេអូឃ្លីបសម្តែងរបស់សាម៉ីខ្លួនចូលមកប្រអប់សារទំព័រហ្វេសប៊ុក PNN TV Cambodia និងទំព័រហ្វេសប៊ុក KIZZ។  រៀងរាល់ខែក្រុមការងារផលិតកម្មវិធីនឹងជ្រើសយកបេក្ខភាព ៥ រូប ដើម្បីដាក់អោយបោះឆ្នោតតាមរយៈការបង្ហោះឃ្លីបវីដេអូទាំង៥ នៅលើផេក PNN TV Cambodia ។ បេក្ខភាព ដែលមានការគាំទ្រខ្លាំងជាងគេបំផុត ១រូប ក្នុងចំណោម៥រូប នឹងត្រូវជ្រើសអោយមានឱកាសច្រៀងដោយផ្ទាល់ក្នុងកម្មវិធីប្រគំតន្រ្តី KIZZ Concert ។ KIZZ Concert ផ្សាយផ្ទាល់រៀងរាល់ ថ្ងៃសុក្រ វេលាម៉ោង ១១:០០ ថ្ងៃត្រង់ ដល់ ម៉ោង ១រសៀល នៅលើកញ្ចក់ ទូរទស្សន៍ PNN និង លើហ្វេសប៊ុកផេក KIZZ៕

ដោយ៖ ម៉ី វ៉ាន់ណែត