ការប្រកួត «Ganzberg ONE Strike»  នៅសប្ដាហ៍ថ្មីនេះកាន់តែថ្មីកាន់តែជក់ចិត្តជាមួយការប្រកួតពីកីឡាករគុនខ្មែរល្បីៗ ខណៈដែរនៅចុងសប្ដាហ៍នេះ សង្វៀនគុនខ្មែររបស់ទូរទស្សន៍ ភីអិនអិន នៅតែបន្តរកំដរអារម្មណ៍ប្រិយមិត្តដោយបានសម្រិតសម្រាងយកគូប្រកួតលក្ខណៈមិត្តភាពអន្តរជាតិដ៏កក្រើកជក់ចិត្តចំនួន ៣ គូ និងអមដោយគូមិត្តភាពជាតិ ២ គូផ្សេងទៀត។

អ្នកប្រដាល់ចាស់វស្សារ មឿន សុខហ៊ុច ត្រូវប្រកួតបិះជាមួយអ្នកប្រដាល់ឆ្លងដែនមកពីថៃស្បែកស្វិតសំបូរក្បាច់ រុង ណាផា ដែលអ្នកទាំងពីរនឹងត្រូវជួបប្រកួតគ្នា លើលក្ខន្តិកៈ ONE Strike ដោយប្រើប្រាស់កហ្គង់ចេញម្រាម ដើម្បីដណ្ដើមប្រាក់រង្វាន់ ១ លានរៀលបន្ថែមពី ស្រាបៀរ ហ្គេនស៍បឺគ។

ចំណែកឯការប្រកួតលក្ខណៈមិត្តភាពអន្តរជាតិ ២ គូផ្សេងទៀត គឺអ្នកប្រដាល់ សូត្រ វាសនា នឹងត្រូវចូលខ្លួនមកប្រកួតតតាំងជាមួយអ្នកប្រដាល់ថៃ កុង ណាផា លើប្រភេទទម្ងន់ 63 គីឡូក្រាម ហើយកីឡាករគុនខ្មែរ ឡុង បេនលឿន នឹងត្រូវតតាំងជាមួយ ស៊ិង យ៉ៃ មកពីប្រទេសឡាវ។

ជាមួយគ្នានោះផងដែរ សង្វៀនគុនខ្មែរ «Ganzberg ONE Strike» របស់ ភីអីនអិន ក៏បានផ្ដល់ឱកាសឲ្យអ្នកស្នងគុនខ្មែរ ៤ រូបផ្សេងទៀត ដើម្បីឡើងប្រកួតប្រជែងល្បងស្នៀតប្រយុទ្ធគ្នា ដែលមានដូចជា សូដា នឹមណូ ត្រូវប្រកួតជាមួយ សាន់ វាសនា និងកីឡាករ សឹង្ហ ហូរ នឹងត្រូវប៉ះគ្នាជាមួយ សុង ប៊ុនរ៉ុង។

សូមប្រិយមិត្តចូលរួមធ្វើជាសាក្សីនៃការប្រកួតដ៏កក្រើកអស្ចារ្យនេះ ដែលមានផ្សាយផ្ទាល់នៅថ្ងៃ អាទិត្យ ទី ២៩ ខែ មករា ឆ្នាំ ២០២៣ នេះ លើកញ្ចក់ទូរទស្សន៍ ភីអិនអិន និង ផេកហ្វេសប៊ុក PNN Sports ចាប់ពីវេលាម៉ោង ១ រសៀលតទៅ៕

ទស្សនាវីឌីអូនៅខាងក្រោម៖

ដោយ៖ សុវណ្ណនី