បន្ទាប់ពី ឡុង សំណាង បានក្លាយជាម្ចាស់ខ្សែក្រវាត់ «Ganzberg ONE Strike»  រដូវកាលទី៣ ដែលទទួលប្រាក់រង្វាន់ ១ ម៉ឺនដុល្លារពី Ganzberg រួចមក នៅចុងសប្ដាហ៍នេះ សង្វៀនគុនខ្មែររបស់ទូរទស្សន៍ ភីអិនអិន នៅតែបន្តរកំដរអារម្មណ៍ប្រិយមិត្តដូចសព្វមួយដង ដោយបានចម្រាញយកគូប្រកួតលក្ខណៈមិត្តភាពអន្តរជាតិដ៏កក្រើកជក់ចិត្តចំនួន ៣ គូ និងអមដោយគូមិត្តភាពជាតិ ២ គូផ្សេងទៀត មកជំនួសវិញ។

អ្នកប្រដាល់ដែលមានរហស្សនាមនាគរាជចតុមុខ ឈឿង ល្វៃ នឹងត្រូវស្វាគមន៍អ្នកប្រដាល់ ឆ្លងដែនមកពីខេត្តប៉ាត់តានីប្រទេសថៃកីឡាករ ភូសាងយ៉ៃ ដាបរ៉ាន់សារ៉ាខាម ដែលអ្នកទាំងពីរនឹងត្រូវជួបប្រកួតគ្នា លើលក្ខន្តិកៈ ONE Strike ដោយប្រើប្រាស់កហ្គង់ចេញម្រាម ដើម្បីដណ្ដើមប្រាក់រង្វាន់ ១ លានរៀលបន្ថែមពី ស្រាបៀរ ហ្គេនស៍បឺគ។

ចំណែកឯការប្រកួតលក្ខណៈមិត្តភាពអន្តរជាតិ ២ គូផ្សេងទៀត គឺអ្នកប្រដាល់ចិត្តសឿង ឡុង បេនលឿន នឹងត្រូវចូលខ្លួនមកប្រកួតតតាំងជាមួយអ្នកប្រដាល់ថៃ មង្ឃុនភិត ស៊ីតសារ៉ាវាត់នឹង លើប្រភេទទម្ងន់ ៦៣.៥ គីឡូក្រាម ហើយកីឡាករគុនខ្មែរ អេ ណារ័ត្ន របស់ក្លិបប្រដាល់អេភូថងកីឡា នឹងត្រូវតតាំងជាមួយ យ៉តផេត ប៉េងកងប្រាប មកពីខេត្តបុរីរ៉ាំ ប្រទេសថៃ។

ជាមួយគ្នានោះផងដែរ សង្វៀនគុនខ្មែរ  «Ganzberg ONE Strike» របស់ភីអីនអិន ក៏បានផ្ដល់ឱកាសឲ្យអ្នកស្នងគុនខ្មែរ ៤ រូបផ្សេងទៀត ដើម្បីឡើងប្រកួតប្រជែងល្បងស្នៀតប្រយុទ្ធគ្នា ដែលមានដូចជា មាស សារ៉ាក់ ត្រូវប្រកួតជាមួយ ខុន សីហា និងកីឡាករ អេលីត សុភា នឹងត្រូវប៉ះគ្នាជាមួយ ម៉ាប់ ថុនា។

សូមប្រិយមិត្តចូលរួមធ្វើជាសាក្សីនៃការប្រកួតដ៏កក្រើកអស្ចារ្យនេះ ដែលមានផ្សាយផ្ទាល់នៅថ្ងៃ អាទិត្យ ទី ១៥ ខែ មករា ឆ្នាំ ២០២៣ នេះ លើកញ្ចក់ទូរទស្សន៍ ភីអិនអិន និង ផេកហ្វេសប៊ុក PNN Sports ចាប់ពីវេលាម៉ោង១រសៀលតទៅ៕

ទស្សនាវីឌីអូខ្លីនៅទីនេះ៖

ដោយ៖ សុវណ្ណនី