ទស្សនិកជន ឬហ្វេនៗជាច្រើនរបស់កញ្ញា ចិត្ត កញ្ចនា ប្រហែលជាបានដឹងហើយថាថ្មីៗនេះ កញ្ញា បានទៅច្រៀងនៅឯឆាកតន្ត្រីដ៏ធំមួយនៅឯប្រទេសកូរ៉េដែលមានមនុស្សចូលរួមទស្សនារាប់ម៉ឺននាក់ឯណោះ។ ក្នុងព្រឹត្តិការណ៍នោះដែរ កញ្ញា ទទួលបានភាពជោគជ័យខ្លាំងមែនទែន តាមរយៈការបកស្រាយទបចម្រៀងពីរោះៗជាច្រើនបទ ថែមទាំងអាចបកស្រាយជាភាសាកូរ៉េបានយ៉ាងល្អថែមទៀតផង ធ្វើអោយប្រជាជនកូរ៉េ និងបងប្អូនខ្មែរដែលរស់នៅទីនោះ មានការសាទរចំពោះកញ្ញាជាខ្លាំង។ 
ចូលមកក្នុងកិច្ចសម្ភាសន៍របស់កញ្ញា នៅក្នុងកម្មវីធី Cambodia Lite Station របស់ស្ថានីយទូរទស្សន៍ភីអិនអិន កញ្ញា បាននិយាយថា អ្វីដែលនាងទទួលបាននាពេលនោះគឺធ្វើអោយនាងរំភើបខ្លាំងមែនទែន ព្រោះគ្រប់គ្នាដែលនៅទីនោះបានសម្តែងក្តីរីករាយទៅតាមបទចម្រៀងរបស់កញ្ញាដែលបានបកស្រាយ។ 

ក្រៅពីរៀបបរាប់ពីអារម្មណ៍នៅឯប្រទេសកូរ៉េ កញ្ញា ក៏បានចែករំលែកនូវបទពិសោធន៍ផ្ទាល់ខ្លួនដែលកញ្ញាបានក្លាយជាអ្នកនិពន្ធបទចម្រៀង និងជាតារាចម្រៀងរហូតមកដល់ពេលនេះ និងឧបសគ្គខ្លះៗដែលកញ្ញាបានជួបចាប់តាំងពីផ្តើមចូលសិល្បៈជាលើកដំបូង។ យ៉ាងណាម៉ិញនៅពេលនេះ កញ្ញា ត្រូវបានគេទទួលស្គាល់ថាជាតារាចម្រៀងស្រីប្រចាំប្រទេសកម្ពុជាមួយរូបដែលមានអ្នកគាំទ្រច្រើន ហើយសម្រាប់បទចម្រៀងនីមួយៗរបស់កញ្ញា ក៏មានអ្នកចូលទៅស្តាប់ច្រើនផងដែរនៅលើបណ្តាញសង្គម។ 

ជាមួយកម្មវិធី Cambodia Lite Station កញ្ចនា ក៏នឹងបកស្រាយបទចម្រៀងដែលជាស្នាដៃរបស់នាងជាច្រើនបទ ដើម្បីជាកាដូរសម្រាប់ហ្វេនៗ ដែលបទចម្រៀងទាំងនោះត្រូវបានបកស្រាយជាមួយសាច់ភ្លេងបែប Acoustic យ៉ាងពីរោះរណ្តំចិត្ត។ 
ចង់ទស្សនាកិច្ចសម្ភាសន៍ទាំងមូល រួមទាំងបទចម្រៀងពីរោះៗ កុំភ្លេចរង់ចាំតាមដានទស្សនាកម្មវិធី Cambodia Lite Station ចាក់ផ្សាយនៅថ្ងៃអាទិត្យ ទី១៥ ខែកញ្ញា ឆ្នាំ២០២៤ វេលាម៉ោង ៥ល្ងាចតទៅ នៅលើកញ្ចក់ទូរទស្សន៍ភីអិនអិន៕ 

ដោយ៖ មុី វ៉ាន់ណែត