ថ្ងៃច័ន្ទ ទី១៧ ខែមិថុនា ឆ្នាំ២០១៩

វគ្គផ្ដាច់ព្រ័ត្រ​ខ្សែក្រវាត់ប្រាក់ ISI PALM ទី១​នឹងមកដល់នៅថ្ងៃអាទិត្យនេះហើយ

០៧ មិថុនា ២០១៩

ថ្ងៃអាទិត្យ​ទី៩ ខែមិថុនា ឆ្នាំ២០១៩ ជាថ្ងៃដ៏រំភើបញាប់ញ័រ​ដំណាក់កាលទី១ នៃយុទ្ធនាការដណ្ដើមខ្សែក្រវាត់​ក្នុងកម្មវិធីអធិរាជគុនខ្មែរ ISI PALM នៅភិអិនអិន ដោយកំពូលកីឡាករគុនខ្មែរ ឡៅ ចិត្រា នឹងប្រឈមមុខជាមួយកីឡាករ​ថៃ កងស្យាម ម៉. រិទ្ធភិថាក់។ ខ្លាកំណាចខេត្តកំពង់ស្ពឺ ឡៅ ចិត្រា កូនសិស្សក្លិបកងពលតូច​ពិសេសទ័ពឆ័ត្រយោង​៩១១ បានឡើងដល់វគ្គផ្ដាច់ព្រ័ត្រ​ខ្សែក្រវាត់ប្រាក់ទី១​របស់ភីអិនអិន បន្ទាប់ពីបានផ្ដួល​កីឡាករថៃ ជេលើនឡាប ឱ្យសន្លប់ក្នុងទឹកទី១ កាលពី​៣សប្ដាហ៍មុន។ ចំណែក កងស្យាម ម៉. រិទ្ធភិថាក់ បានមកដល់វគ្គនេះ​ក្រោយយកឈ្នះពិន្ទុលើ សារឿន ច័ន្ទ កាលពី​២សប្ដាហ៍មុន។


ខ្សែក្រវាត់ប្រាក់​អធិរាជគុនខ្មែរ ISI PALM គឺជាស្ពាន​សម្រាប់កីឡាករទទួលបានសិទ្ធិ​ឆ្ពោះទៅប្រកួតប្រជែងយកខ្សែក្រវាត់មាស​ដែលមានប្រាក់រង្វាន់ដល់ទៅ​៤០លានរៀល។ សម្រាប់ខ្សែក្រវាត់ប្រាក់នេះ​ក៏មានប្រាក់រង្វាន់លើកទឹកចិត្ត​៤លានរៀលផងដែរ​ដល់ជ័យលាភី។ នៅថ្ងៃអាទិត្យ ទី៩ ខែមិថុនានេះ អធិរាជគុនខ្មែរ ISI PALM ថែមទាំងមានឈុតសម្ដែងពិសេស​សម្រាប់កំដរអារម្មណ៍ទស្សនិកជន ក៏ដូចជាញ៉ាំងបរិយាកាស​ឱ្យកាន់តែសប្បាយរីករាយនិងកាន់តែជក់ចិត្ត​ថែមមួយកម្រិតទៀតផង។


ក្រៅពីគូដណ្ដើមខ្សែក្រវាត់ប្រាក់ទី​១​​ខាងលើ នៅមានគូមិត្តភាពអន្តរជាតិ​ជក់ចិត្ត៣គូផ្សេងទៀត ដោយម្ចាស់មេដាយសំរឹទ្ធស៊ីហ្គេម វ៉ាន់ វឿន នឹងតតាំងជាមួយជើងខ្លាំងថៃ យ៉តចក្រគ្រិត និងអមដោយ​គូពន្លកគុនខ្មែរទល់នឹងថៃពីរគូផ្សេងទៀត។ អធិរាជគុនខ្មែរ ISI PALM ផ្សាយផ្ទាល់លើកញ្ចក់ទូរទស្សន៍​ភីអិនអិន និងផេកហ្វេសប៊ុក PNN Sports, ISI STEEL រៀងរាល់ថ្ងៃអាទិត្យ ចាប់ពីម៉ោង​១២ថ្ងៃត្រង់តទៅ៕

ចង់ជ្រាបកាន់តែច្បាស់សូមទស្សនាឈុតខ្លី៖

Copyright © 2017 PNN TV. All Rights Reserved.