ថ្ងៃព្រហស្បតិ៍ ទី១៤ ខែ​វិច្ឆិកា ឆ្នាំ២០១៩

រឿងភាគខ្មែរថ្មី​លាតត្រដាងជីវិតគូស្វាមីភរិយា​តាំងពីថ្ងៃជួបរហូតថ្ងៃបែក « ភរិយាសម័យថ្មី »

០៤ កក្កដា ២០១៩

សម្រាប់ស្ត្រីតែកាលណា​នាងសាងជីវិតគ្រួសារ រៀបការមានស្វាមីជាដៃគូ​សំខាន់សម្រាប់ខ្លួនហើយ គ្មាននារីណាម្នាក់ ប្រាថ្នាស្គាល់រស់ជាតិ​នៃការបែកបាក់ ព្រាត់ប្រាស់ លែងលះគ្នានោះទេ។ តែយ៉ាងណាក្តី​វិថីជីវិតមិនមែនចេះតែធំទូលាយ ហើយផ្តល់នូវជម្រើសច្រើនរហូតឡើយ ពេលណាសម្ពាធនៃបញ្ហា​កើនធ្ងន់ហួសព្រំដែនកំណត់ហើយ ទោះរបស់នោះជារតនៈវត្ថុ ក៏គង់នៅមានមនុស្ស​ព្រមលែងដៃបោះបង់ចោល​ឥតស្តាយស្រណោះ ឯរឿងរ៉ាវក្តីស្នេហ៍ស្រីប្រុស​ក៏មានលំនាំដូចគ្នានេះដែរ។ ផ្តោតលើហេតុផល​ព្រមឈឺចាប់ក្នុងពេលខ្លី ប្រសើរជាងរស់ត្រាំត្រែង​នឹងបញ្ហាពេញមួយជីវិត ទើបតួឯកស្រីក្នុងរឿង « ភរិយាសម័យថ្មី » គឺអ្នកនាង បុស្បា នាងសម្រេចចិត្ត​លែងលះប្តីជាស្នេហ៍ដំបូង ជាមនុស្សប្រុសតែម្នាក់​ដែលនាងស្រលាញ់ហួងហែងខ្លាំង និងថ្នាក់ថ្នមយកចិត្ត​ទុកដាក់ផ្តល់កម្លាំងចិត្ត​អំឡុងពេល៥ឆ្នាំដោយឥតស្តាយស្រណោះ។
អ្នកនាង បុស្បា និងលោក យុទ្ធ ជាស្វាមី
ក្រោយរៀបការរួច ហើយទទួលបានការយកចិត្ត​ទុកដាក់ប្រឹក្សាយោបល់ ផ្តល់កម្លាំងចិត្តពីប្រពន្ធ​រហូតមានភាពជោគជ័យក្នុងមុខជំនួញ ក្លាយជាម្ចាស់ក្រុមហ៊ុនផ្គត់ផ្គង់គ្រឿងសំណង់ លោក យុទ្ធ ក៏ក្លាយជាមនុស្សប្រុសចេះក្បត់ចិត្តប្រពន្ធ។ មានចិញ្ចឹមស្រី​លួចលាក់ក្រៅផ្ទះមិនគ្រប់ តែនាយក៏នៅភ្ជាប់ទំនាក់ទំនង​ស្នេហានឹងនាង ម៉ាល័យ ជាប្អូនជីដូនមួយរស់នៅក្នុងផ្ទះ​ជាមួយគ្នាថែមទៀត។ មូលហេតុនេះហើយ​ទើបប្រពន្ធអស់ជំនឿ សុខចិត្តផ្តាច់ចំណងអាពាហ៍ពិពាហ៍​ក្លាយជាស្ត្រីមេម៉ាយ ថែទាំចិញ្ចឹមកូនតែម្នាក់ឯង។
លោក យុទ្ធ និងស្រីកំណាន់ កញ្ញា ដារីកា ព្រមទាំងម្តាយមីងរបស់នាង
ទោះជីវិតជួបព្យុះភ្លៀង ក្លាយជាស្ត្រីមេម៉ាយ​ត្រូវរ៉ាប់រងបន្ទុកគ្រួសារ ថែទាំកូនម្នាក់ឯង តែបុស្បានាងនៅតែរឹងមាំ​ហើយព្យាយាមជម្នះឧបសគ្គជានិច្ច។ ឯចំណុចល្អជាស្ត្រីរឹងមាំ​ប្រសប់ធ្វើកិច្ចការផ្ទះថែគ្រួសារស្មើរចុងស្មើរដើម​របស់អ្នកមេម៉ាយរូបនេះ ក៏ក្លាយជាមុខអាវុធមុតស្រួច​ចាក់ទម្លុះបេះដូងកំលោះ ជេម ជាមិត្តរបស់ប្អូនប្រុសនាង​ឱ្យជំពាក់ចិត្តកាន់តែខ្លាំងរហូតដកខ្លួនពុំរួច។ ត្បិត ជេម ជាបុរសវ័យក្មេងដែលជោគជ័យ​ម្នាក់ក្នុងការងារ ហើយមានមិត្តស្រីស្រស់ស្អាត​កាន់តំណែងជាCEO​របស់ក្រុមហ៊ុនមួយបែបណា តែដោយសារនាងមានចរិតមានៈ យល់តែចិត្តខ្លួនឯង ហើយធ្វើការសម្រេចចិត្ត​ដោយផ្តោតលើគំនិតខ្លួនឯងជាធំ នាទីបញ្ចប់ទំនាក់ទំនងស្នេហា​របស់ពួកគេក៏ដើរដល់ផ្លូវបំបែក។ ចុងក្រោយចិត្តស្នេហ៍ បូករួមនឹងភាពជិតស្និទ្ធ​នៃការបង្កើតមុខរបរជាមួយគ្នា លោក ជេម និងអ្នកនាង បុស្បា ក៏មានឱកាសស្វែងយល់ពីគ្នា​កាន់តែច្រើនជាងមុន រហូតឈានទៅចាប់ដៃសាង​ជីវិតគ្រួសារថ្មីរួមគ្នាតែម្តង។
 អ្នកនាង បុស្បា និងលោក ជេម ព្រមទាំងកូនរបស់ពួកគេ
សូមទស្សនាវីដេខ្លី៖



កាលបរិច្ឆេទចាក់ផ្សាយ៖ ថ្ងៃទី០៨ ខែកក្កដា ឆ្នាំ២០១៩
ម៉ោងចាក់ផ្សាយ៖ វេលាម៉ោង៨ រហូតម៉ោង៩យប់ រៀងរាល់ថ្ងៃចន្ទ ដល់ថ្ងៃពុធ
តួសម្តែង៖ អ្នកនាង បុស្បា សម្ដែងដោយកញ្ញា ណាក់ ស្រីណា
 លោក ជេម សម្តែងដោយលោក ប៊ឺរី

អត្ថបទ៖ កញ្ញា ឃុន វ៉ាន់ដា
 

Copyright © 2017 PNN TV. All Rights Reserved.