ផាវីនី មានប្អូនស្រីដ៏ស្រស់ស្អាតម្នាក់ ឈ្មោះ កាន់ដា ដែលនាងជាកូនស្រីក្នុងគ្រួសារត្រូវបានឪពុកស្រឡាញ់ និងថ្នាក់ថ្នមជាងគេ។ ថ្ងៃមួយ កាន់ដា បានលង់ស្នេហ៍ជាមួយនឹង ផាណៃ បើទោះបីជាឪពុករបស់នាង មិនពេញចិត្តយ៉ាងណាក៏ដោយ។ កាន់ដា និងផាណៃ បាននាំគ្នារត់ចេញពីផ្ទះ ហើយថ្ងៃមួយ ផាវីនី ក៏បានជួបនឹងកាន់ដា ដោយចៃដន្យ។ ផាវីនី ប្លែកចិត្ត ដែលឃើញប្អូនស្រីខ្លួនមានសភាពស្គមខ្លាំង ហើយក្រោយមក ក៏បណ្តាលឲ្យកាន់ដា បាត់បង់ជីវិត។ 
មរណភាពរបស់កាន់ដា បានធ្វើឲ្យផាវីនីជាបងស្រីមានចិត្តខឹងយ៉ាងខ្លាំងចំពោះគ្រួសារផាណៃ ហើយដើម្បីសងសឹកវិញ ផាវីនី ក៏ព្រមចុះសំបុត្រអាពាហ៍ពិពាហ៍ជាមួយនឹងផាណៃ ប៉ុន្តែគ្រាន់តែមិនចង់ឲ្យក្មួយប្រុស កូនរបស់កាន់ដា គ្មានម្តាយ។ ម្តាយរបស់ផាណៃ ជាមនុស្សចាស់ យល់តែពីអារម្មណ៍ខ្លួនឯង ប៉ុន្តែប៉ះជាមួយនឹង ផាវីនី នារីកំពូលឆ្នាស់ដែរ សង្គ្រាមម្តាយក្មេក និងកូនប្រសារក៏ចាប់ផ្តើមឡើង។