រឿងភាគខ្មែរថ្មីសន្លាងរបស់ស្ថានីយទូរទស្សន៍ ភីអិនអិន កំពុងតែធ្វើអោយហ្វេនៗទន្ទឹងរង់ចាំទស្សនាពីសាច់រឿងលម្អិត ថាតើ ហេតុអីបានជារឿងភាគខ្មែរមួយនេះ ដាក់ចំណងជើងថា ហេតុអ្វីជាពួកយើង? ពិតណាស់ រឿងភាគខ្មែរមួយនេះ នឹងកាន់តែធ្វើអោយទស្សនិកជនមានចម្ងល់កាន់តែខ្លាំងពេលបានទស្សនាចាប់ពីភាគដំបូងទៅ។ 

រឿង ហេតុអ្វីជាពួកយើង មានការចូលរួមសម្តែងពីសំណាក់តារាសម្តែងល្បីៗជាច្រើនដួងរួមមាន តារាប្រុសរាងសង្ហា ខាត់ វៃហាំង សម្តែងជាតួ មៃឃើ ចាប់ដៃគូជាមួយ កញ្ញា ស្រស់សោភា ឆាយ នីតា សម្តែងជាតួ លីនដា តារាសម្តែងស្រីថ្ពាល់ខួច អូនតូចជូពី សម្តែងជាតួ រីកា។

នុងរឿងនេះក៏មានតារាសម្តែងជាច្រើនដួងទៀតរួមមាន លោក ចន ស័ក្តិ សម្តែងជាតួ ឆេន លោក ជួប សារ៉ាវុធ សម្តែងជាតួ ណារ៉ា រួមទាំងតារាប្រុសស្រីល្បីៗជាច្រើនដួងទៀតផងដែរ។  ហេតុអ្វីជាពួកយើង មានសាច់រឿងគួរអោយចាប់អារម្មណ៍ខ្លាំង ដោយនិយាយពីវាសនារបស់កូនភ្លោះពីរនាក់ ដែលបានបែកគ្នាព្រោះតែគំនុំរបស់ចាស់ៗ។ លីនដាគឺជាកូនស្រីរបស់លោកសម្បត្តិ ដែលជាអ្នកមានទ្រព្យមហាសាល និងមានក្រុមហ៊ុនជាច្រើននៅក្នុងដៃ។

នាងបានស្រឡាញ់គ្នាជាមួយនឹងម៉ៃឃើ ប៉ុន្តែមៃឃើ បានកុហកនាងថាគេក៏ជាកូនអ្នកមានទ្រព្យសម្បត្តិគួរសមផងដែរ ប៉ុន្តែតាមពិតមៃឃើគ្រាន់តែជាកូនអ្នកធម្មតាៗប៉ុណ្ណោះ។ អ្នកទាំងពីរបានស្រឡាញ់គ្នា រហូតចាស់ទុំទាំងសង្ខាងយល់ព្រមរៀបចំពិធីរៀបការអោយ ប៉ុន្តែជាអកុសល ជិតដល់ថ្ងៃរៀបការទៅហើយ លីនដា ក៏បានរអឹលជើងធ្លាក់ពីលើជ្រោះរកមិនឃើញ តែបែរជារកឃើញលីននីដែលជាប្អូនភ្លោះ ជំនួសទៅវិញ ដោយគ្រប់គ្នាយល់ថា លីនីគឺជាលីដា រួចក៏ផ្សំផ្គុំរៀបការអោយលីននី និងម៉ៃឃើ។ 

តើអាពាហ៍ពិពាហ៍ដែលកើតឡើងព្រោះតែការបំភ័ន្តភ្នែកនឹងមានរឿងអ្វីកើតឡើងខ្លះ? តើលីនដា រអឹលជើងធ្លាក់ចូលទៅក្នុងជ្រោះជាការរៀបចំ ឬក៏ជារឿងចៃដន្យ? បើចង់ជ្រាបច្បាស់ កុំភ្លេចរង់ចាំតាមដានទស្សនា រឿង ហេតុអ្វីជាពួកយើង? ចាក់ផ្សាយរៀងរាល់ថ្ងៃច័ន្ទ ដល់ ថ្ងៃព្រហស្បតិ៍ វេលាម៉ោង ៨យប់តទៅ​ នៅលើកញ្ចក់ទូរទស្សន៍ភីអិនអិន៕