អ្នកគុននិយមប្រើកណ្តាប់ ដៃ កែង និង ជង្គង់ សរុបចំនួន 10 នាក់បានប្រមូលផ្តុំគ្នាមកប្រកួតនាកម្មវិធី Ganzberg Kun Khmer Super Strike របស់ស្ថានិយ៍ទូរទស្សន៍ PNN ទៀតហើយនារសៀលម៉ោង 1 ថ្ងៃអាទិត្រ ទី 16 កុម្ភៈ 2025 នេះ។ ក្នុងចំណោមពួកគេទាំងនោះ ក៏មានកីឡាករដែលធ្វើដំណើរមកពីប្រទេសថៃ 2 រូបផងដែរគឺ ផេតម៉ាទ្បៃ និង សារ៊ីមុងឃុន ដែលមានមហិច្ឆតាចង់ឈ្នះលើកីឡាករកម្ពុជារបស់យើង។ បើតាម ផេតម៉ាទ្បៃ ដែលត្រូវប្រកួតជាមួយ ឆៃធន់ បូរី បានលើកឡើងថានៅភូមិស្រុករបស់គេតែងតែល្បីពីការប្រកួតកីឡាគុនខ្មែរ ហើយអ្នកប្រដាល់ខ្មែរសុទ្ធតែជាកីឡាករខ្លាំងៗ ជាក់ស្តែងគឺពិតដូចជាការល្បីមែនដូច្នេះហើយទើបគេសម្រេចមកប្រកួតនៅទីនេះម្តងទៀតដើម្បីដកស្រង់បទពិសោធន៍ក៏ដូចជាចង់ជួបដៃគូកាន់តែតាន់ជាងមុន។

ក៏មិនខុសគ្នាដែរសម្រាប់ ស៊ីសារ៊ីមុងឃុន ដែលត្រូវប៉ះគ្នាជាមួយ ខាំ ខ្លានាង ឯណោះវិញគេបានលើកឡើងថាការប្រកួតជាមួយកីឡាករបរទេសដទៃគឺមានការខុសប្លែកគ្នាពីការប្រកួតជាមួយកីឡាករខ្មែរ។ ការប្រកួតលក្ខណៈគុនខ្មែរគឺមិនងាយស្រួលសម្រាប់គេនោះទេ ហើយគេតែងតែទទួលអារម្មណ៍ថាខ្លួនជាអ្នកប្រយុទ្ធក្បាច់គុនប្រដាល់ដ៏ពិតប្រាកដមួយពេលប៉ះជាមួយកីឡាករខ្មែរ ពោលបើឈ្នះក៏មិនស្រួលសាច់ បើចាញ់គឺរិតតែពិបាកនិងបន្សល់ទុកនូវស្លាកស្នាមមុខរបួសជាដើម។

Ganzberg Kun Khmer Super Strike នៅមានគូមិត្តភាពជាតិចំនួន 3 គូទៀតដែរសម្រាប់ថ្ងៃអាទិត្យនេះគឺ ដែន ភក្តី ត្រូវប្រកួតជាមួយ ខាំ ខ្លាស័ក្តិ ជាគូបើកឆាក។ គូទី 2 ធន់ វុទ្ធី ប្រកួតជាមួយ វីគី ជ័យវណ្ណី និងគូទី៤ ទ្បុង សំណាង ប្រកួតជាមួយ យុគយក្សខួច។

សូមចូលរួមលើកស្ទួយកីឡាគុនខ្មែររបស់យើងឲ្យកាន់តែល្បីរន្ទឺថែមទៀតដោយគ្រាន់ចូលរួមទស្សនាផ្ទាល់នៅស្ថានីយ៍ទូរទស្សន៍ PNN ក៏ដូចជាការផ្សាយផ្ទាល់នៅលើកញ្ចក់ទូរទស្សន៍ PNN និងគេហទំព័រផ្លូវការណ៍ PNN Sport តាមពេលវេលានិងម៉ោងដូចដែលបានជម្រាបជូននៅខាងលើ។

ដោយ៖ ក្រុមកាងារកីឡាPNN