អ្នកគុននិយមប្រើកណ្តាប់ ដៃ កែង និង ជង្គង់ សរុបចំនួន 10 នាក់បានប្រមូលផ្តុំគ្នាមកប្រកួតនាកម្មវិធី Ganzberg Kun Khmer Super Strike របស់ ស្ថានិយ៍ទូរទស្សន៍ PNN ទៀតហើយនារសៀលម៉ោង 1 ថ្ងៃអាទិត្រ ទី 19 មករា 2025 នេះ។
ក្នុងចំណោមពួកគេទាំងនោះ ក៏មានកីឡាករដែលធ្វើដំណើរមកពីប្រទេសថៃ 2 រូបផងដែរគឺ ស៊ីងអ៊ុប៊ុន និង ឡាហ្វាន់ ដែលមានមហិច្ឆតាចង់ឈ្នះលើកីឡាករកម្ពុជារបស់យើង។ បើតាម ឡាហ្វាន់ ឆ.រ៉ាតឆាមុងឃុន ដែលត្រូវប្រកួតជាមួយ ឆៃលី បានលើកឡើងថានៅភូមិស្រុករបស់គេតែងតែល្បីពីការប្រកួតកីឡាគុនខ្មែរ ហើយអ្នកប្រដាល់ខ្មែរសុទ្ធតែជាកីឡាករខ្លាំងៗ ជាក់ស្តែងគឺពិតដូចជាការល្បីមែនដូច្នេះហើយទើបគេសម្រេចមកប្រកួតនៅទីនេះម្តងទៀតដើម្បីដកស្រង់បទពិសោធន៍ក៏ដូចជាចង់ជួបដៃគូកាន់តែតាន់ជាងមុន។

ក៏មិនខុសពី ឡាហ្វាន់ ដែរសម្រាប់ ស៊ីងអ៊ុប៊ុន ដែលត្រូវប៉ះគ្នាជាមួយ ម៉ឺន ដា ឯណោះវិញគេបានលើកឡើងថាការប្រកួតជាមួយកីឡាករបរទេសដទៃគឺមានការខុសប្លែកគ្នាពីការប្រកួតជាមួយកីឡាករខ្មែរ។ ការប្រកួតលក្ខណៈគុនខ្មែរគឺមិនងាយស្រួលសម្រាប់គេនោះទេ ហើយគេតែងតែទទួលអារម្មណ៍ថាខ្លួនជាអ្នកប្រយុទ្ធក្បាច់គុនប្រដាល់ដ៏ពិតប្រាកដមួយពេលប៉ះជាមួយកីឡាករខ្មែរ ពោលបើឈ្នះក៏មិនស្រួលសាច់ បើចាញ់គឺរិតតែពិបាកនិងបន្សល់ទុកនូវស្លាកស្នាមមុខរបួសជាដើម។ Ganzberg Kun Khmer Super Strike នៅមានគូមិត្តភាពជាតិចំនួន 3 គូទៀតដែរសម្រាប់ថ្ងៃអាទិត្យនេះគឺ ដែន នេនហ្វុង ត្រូវប្រកួតជាមួយ ខាំ ពិសិដ្ឋ ជាគូបើកឆាក។ គូទី២ ធន់ ទ្បុងហាក់ ត្រូវប្រកួតជាមួយ ផានិត វ៉ាន់ហួន និងគូទី៤ ធន់ អៀនទ្បុង ត្រូវប្រកួតជាមួយ ឌីម សារ៉ា។

សូមចូលរួមលើកស្ទួយកីឡាគុនខ្មែររបស់យើងឲ្យកាន់តែល្បីរន្ទឺថែមទៀតដោយគ្រាន់ចូលរួមទស្សនាផ្ទាល់នៅស្ថានីយ៍ទូរទស្សន៍ PNN ក៏ដូចជាការផ្សាយផ្ទាល់នៅលើកញ្ចក់ទូរទស្សន៍ PNN និងគេហទំព័រផ្លូវការណ៍ PNN Sport តាមពេលវេលានិងម៉ោងដូចដែលបានជម្រាបជូននៅខាងលើ។

ដោយ៖ ក្រុមកាងារកីឡាPNN