សង្វៀន BOOSTRONG KING OF POWER KUNKHMER បានឈានដល់សប្ដាហ៍ទី៣ហើយនាថ្ងៃសៅរ៍ ទី២៦ ខែតុលា ឆ្នាំ២០២៤នេះ ជាមួយនឹងការប្រកួតលក្ខណៈអន្តរជាតិដ៏កក្រើកចំនួនពីរគូ និងការប្រកួតជើងខ្លាំងគុនខ្មែរប៉ះគុនខ្មែរយ៉ាងជក់ចិត្តចំនួនបីគូបន្ថែមទៀតផងដែរ។  កំពូលជើងខ្លាំងដែលនឹងមកបញ្ចេញស្នៀតគុនអង្រួនសង្វៀន PNN ក្នុងការប្រកួតមិត្តភាពអន្តរជាតិនាប្ដាហ៍នេះមានដូចជា ជើងខ្លាំងគុនខ្មែរល្អជង្គង់មកពីក្លិបប្រដាល់គុនខ្មែរអន្តរជាតិ (KKIF) កីឡាករឡុង សំណាងនឹងត្រូវប៉ះដៃគូថ្មីម្ចាស់ខ្សែក្រវាត់មកពីប្រទេសថៃ ឌីតូ ណាំម៉ាន់ណួតប្រាយដែលអ្នកទាំងពីរណាត់គ្នាលើប្រភេទទម្ងន់ ៦៥គីឡូក្រាម រីឯអ្នកប្រដាល់ចិត្តសឿងដៃធ្ងន់ ធន់ ឆៃលីរបស់សមាគមកីឡាប្រដាល់កងយោធពលខេមរភូមិន្ទនឹងត្រូវប្រកួតអន្តរជាតិលើកដំបូងនៅសង្វៀន PNN ជាមួយជើងខ្លាំងមកពីប្រទេសថៃ ផេតម៉ាឡៃ ស៊ីតម៉ាឡៃថង ដែលការប្រកួតធ្វើឡើងលើប្រភេទទម្ងន់ ៥៤គីឡូក្រាម ចំពោះការប្រកួតមិត្តភាពអន្តរជាតិទាំងពីរគូខាងលើនេះប្រព្រឹត្តទៅលើលក្ខន្តិកៈគុនខ្មែរប្រាំទឹក ក្នុងមួយទឹកមានរយៈពេលបីនាទី។

  ចំណែកឯការប្រកួតលក្ខណៈមិត្តភាពគុនខ្មែរយ៉ាងជក់ចិត្តបីគូផ្សេងទៀតនោះមាន សេក ចាន់រាជរបស់ក្លិបប្រដាល់អង្គរមានជ័យយុទ្ធភូមិភាគទី៤ខេត្តសៀមរាបប្រកួតជាមួយធន់ ចំណាប់របស់សមាគមកីឡាប្រដាល់កងយោធពលខេមរភូមិន្ទ ចំណែកឯអ្នកប្រដាល់វ័យក្មេង ថេន មានជ័យរបស់ក្លិបប្រដាល់ប៉ែនកាក់សេនប៊ុនថេនគុនខ្មែរប្រកួតជាមួយគឿម សុវណ្ណឌឿតមកពីក្លិបប្រដាល់ឃ្លាំងមឿងកីឡាខេត្តពោធិ៍សាត់ ខណៈដែលរីគី អេមអាគមមកពីក្លិបប្រដាល់ខ្លារខិនមានរិទ្ធប្រកួតជាមួយសេក គឹមបេនមកពីក្លិបប្រដាល់អង្គរមានជ័យយុទ្ធភូមិភាគទី៤ ចំពោះការប្រកួតមិត្តភាពជាតិទាំងបីគូខាងនេះប្រព្រឹត្តទៅលើលក្ខន្តិកៈគុនខ្មែរបីទឹក ក្នុងមួយទឹកមានរយៈពេលបីនាទី។

សូមប្រិយមិត្តចូលរួមធ្វើជាសាក្សីនៃការប្រកួតដ៏កក្រើកអស្ចារ្យនេះ ដោយចូលរួមទស្សនាឱ្យបានច្រើនកុះករ ដែលការប្រកួតនឹងចាប់ផ្ដើមផ្សាយផ្ទាល់ចាប់ពីវេលាម៉ោង ៤:៣០នារីរសៀលតទៅ នៅលើកញ្ចក់ទូរទស្សន៍ ភីអិនអិន, ហ្វេសបុកផេក, ទំព័រយូធូប PNN Sports ហ្វេសបុក Boostrong និង App PNN PLUS។ ម្រាប់បងប្អូនដែលទស្សនាតាមទូរស័ព្ទដៃសូមកុំភ្លេចស៊ែចែករំលែកផងណាដើម្បីចែករម្លែកការប្រកួតគុនខ្មែររបស់យើងទៅកាន់ពិភពលោកឱ្យពិភពលោកកាន់តែស្គាល់ថែមទៀត។

ដោយ៖ Cheng