ព្រឹត្តិការណ៍ការប្រកួតដ៏ធំ GANZBERG Kun Khmer Super Strike ប្រចាំខែរបស់ ស្ថានីយ៍ទូរទស្សន៍ PNN នឹងកាន់តែពិសេសកក្រើកទ្វេដងជាមួយនឹងកីឡាករគុនខ្មែរល្បីៗលំដាប់ប្រទេស និងកីឡាករជើងខ្លាំងមកពីគ្រប់ទិសទីជុំវិញពិភពលោក ។
ចំពោះការប្រកួតប្រដាល់គុនខ្មែរ នាថ្ងៃអាទិត្រ ទី២៩ ខែកញ្ញាចុងសប្តាហ៍នេះ សង្វៀន PNN បានសម្រិតសម្រាំងគូជក់ចិត្តមិត្តភាពអន្តរជាតិ ចំនួន១គូ រួមជាមួយការប្រកួតគូដណ្តើមខ្សែក្រវាត់ដល់ទៅ២គ្រឿង ក្នុងថ្ងៃតែមួយ ។

សម្រាប់សមាសភាពជើងខ្លាំងដែលត្រៀមចូលខ្លួនប្រជែងខ្សែក្រវាត់ក្នុងប្រភេទទម្ងន់៦៧គីឡូក្រាមគឺជាការប្រកួតម៉ារ៉ាតុង កីឡាករគុនខ្មែរម្នាក់រួមជាមួយកីឡាករបរទេស៣នាក់ មានដូចជា ទាហានខ្នាយតាន់ ឡៅ ចិត្រា , ខ្លាឃ្មុំទឹកកកមកពីអ៊ីរ៉ង់ សាមេន ម៉ូរ៉ាឌី , ខ្លាកំណាចមកពីអ៊ីរ៉ង់ អាមេន ម៉ូរ៉ាឌី , ឥន្ទ្រីក្រញាំដែកមកពីថៃ បាឡាំងសាប់ មឿងឆៃយ៉ាភូមិ ។

ចំពោះការប្រកួតម៉ារ៉ាតុងខាងលើនេះនឹងប្រព្រឹត្តទៅលើលក្ខន្តិកៈគុនខ្មែរ៣ទឹក ក្នុងមួយទឹកមានរយៈពេលបីនាទី នៅជុំដំបូង ខណៈវគ្គផ្តាចព្រ័ត្រ ប្រកួតក្នុងលក្ខន្តិកៈ ៥ទឹក ក្នុងមួយទឹកមានរយៈពេលបីនាទី ។ ចំណែកការប្រកួតដណ្តើមខ្សែក្រវាត់១គ្រឿងទៀត ក្នុងប្រភេទទម្ងន់៦០គីឡូក្រាម គឺជាការឡើងការពាររបស់ ឈុតសេរី វ៉ាន់ថង ដោយ ឡុង ជិន អ្នកមកដណ្តើម ។រំលឹកថា ជំនួបរវាង ឈុត​ សេរី​វ៉ាន់​ថង និង ឡុង ជិន ធ្លាប់ចួបគ្នា៤លើករួចមកហើយ ខណៈជំនួបនៅសង្វៀន PNN ជាការប៉ះគ្នាលើកទី៥ ។ ទន្ទឹមនោះក៏មានការប្រកួតគូមិត្តភាពអន្តរជាតិ១គូផងដែរ ដែលជាការបង្ហាញវត្តមានរបស់ខ្លាសរចង្កូមពិស ប៊ុន សុធា នឹងត្រៀមទទួលស្វាគមន៍ជើងខ្លាំងមកពី​អាល់ហ្សេរី ហូសេម​ហ្វារ៉ាស់។

ដែលការប្រកួតដ៏ជក់ចិត្តនេះ នឹងចាប់ផ្តើមចាប់ពីវេលាម៉ោង១រសៀលតទៅ ដោយមានការផ្សាយផ្ទាល់លើកញ្ចក់ ទូរទស្សន៍ PNN ផេកហ្វេសប៊ុក យូធូប  PNN Sports និងផេក Beer Ganzberg ។ អ្នកគាំទ្រក៏អាចអញ្ជើញចូលរួមទស្សនាផ្ទាល់ដោយសេរី នៅ​ ស្ថានីយទូរទស្សន៍ ដែលមានទីតាំងស្ថិតនៅខណ្ឌព្រែកព្នៅ រាជធានីភ្នំពេញ ៕

ដោយ៖ ក្រុមកាងារកីឡាPNN