ការប្រកួតប្រដាល់ GANZBERG Kun Khmer Super Strike របស់ ស្ថានីយ៍ទូរទស្សន៍ PNN នា ចុងសប្ដាហ៍ថ្ងៃអាទិត្យ ទី១៥ ខែកញ្ញា ឆ្នាំ២០២៤នេះ កាន់តែពិសេសកក្រើកទ្វេដងជាមួយ នឹង កីឡាករគុនខ្មែរល្បីៗលំដាប់ប្រទេស និងកីឡាករជើងខ្លាំងគ្រប់ទិសទី ដែលសង្វៀន PNN បាន សម្រិតសម្រាំងគូជក់ចិត្តចំនួនប្រាំគូ ក្នុងនោះផងដែងមានការប្រកួតលក្ខណៈមិត្តភាពអន្តរ ជាតិ ដ៏កក្រើកចំនួនពីរគូ និងការប្រកួតគុនខ្មែរប៉ះគុនខ្មែរចំនួនបីគូបន្ថែមទៀត។

សម្រាប់ការប្រកួតគូឯក គឺជាការចេញប្រយុទ្ធរបស់លោកមេទ័ព សូត្រ ប៊ុនធី នឹងត្រូវត្រៀមស្វាគមន៍ ដៃគូចាស់ជើងខ្លាំងមកពីប្រទេសថៃ អេកណាខន  ហួយរ៉ាត  ក្នុងប្រភេទទម្ងន់ ៦៣.៥គីឡូក្រាម  រីឯការប្រកួតអន្តរជាតិមួយគូទៀតគឺជាការជួបគ្នារវាងខ្លាសរចង្កូមពិស ប៊ុន សុធា នឹង ត្រូវស្វាគមន៍ដៃគូថ្មី មកពីប្រទេសថៃ ថេបម៉ាំងកន ស.កងគៀត ក្នុងប្រភេទទម្ងន់ ៥៤គីឡូក្រាម។

ចំពោះការប្រកួតមិត្តភាពអន្តរជាតិទាំងពីរគូខាងលើនេះប្រព្រឹត្តទៅលើលក្ខន្តិកៈគុនខ្មែរប្រាំទឹក ក្នុងមួយទឹកមានរយៈពេលបីនាទី។ ក្រៅពីគូអន្តរជាតិដ៏ជក់ចិត្តខាងលើនេះ PNN ក៏បានផ្ដល់ឳកាសដល់កីឡាករថ្នាលគុនខ្មែរជំនាន់ក្រោយពោរពេញដោយសមត្ថភាពចំនួនបីគូផ្សេងទៀតដូចជា ដែន វេហា មកពីក្លឹបគុនខ្មែរដែនសមុទ្រ ត្រូវប៉ះ សុភាព ចេស្តា មកពីក្លឹបសុភាពគុនខ្មែរ ក្នុងប្រភេទទម្ងន់៥៤គីឡូក្រាម , រីឯ ឡៅ រចនា មកពីក្លឹបបញ្ជាការដ្ឋានទ័ពពិសេស ត្រូវប៉ះ ធន់ ចាន់ណា មកពីក្លឹបកងយោធពលខេមរភូមិន្ទ ក្នុងប្រភេទទម្ងន់៥៧គីឡូក្រាម , ចំណែក ជិន ចាង មកពីក្លឹបឃ្លាំងមឿងកីឡាខេត្តពោធិ៍សាត់ ត្រូវប៉ះ ផាន់ សុផាត មកពីក្លឹបគុនខ្មែរស៊ុបភើហ្វៃ ក្នុងប្រភេទទម្ងន់ ៦០គីឡូក្រាម ។

ដែលការប្រកួតដ៏ជក់ចិត្តនេះ នឹងចាប់ផ្តើមចាប់ពីវេលាម៉ោង១រសៀលតទៅ ដោយមានការផ្សាយផ្ទាល់លើកញ្ចក់ទូរទស្សន៍ PNN ផេកហ្វេសប៊ុក យូធូប  PNN Sports និងផេក Beer Ganzberg ។ អ្នកគាំទ្រក៏អាចអញ្ជើញចូលរួមទស្សនាផ្ទាល់ដោយសេរី នៅស្ថានីយទូរទស្សន៍ ដែលមានទីតាំងស្ថិតនៅខណ្ឌព្រែកព្នៅ រាជធានីភ្នំពេញ ៕

ដោយ៖ ក្រុមកាងារកីឡាPNN