ការប្រកួតប្រដាល់ GANZBERG Kun Khmer Super Strike របស់ ស្ថានីយ៍ទូរទស្សន៍ PNN នាចុងសប្ដាហ៍ថ្ងៃអាទិត្យ ទី១ ខែកញ្ញា ឆ្នាំ២០២៤នេះ កាន់តែពិសេសកក្រើកទ្វេដងជាមួយនឹងកីឡាករគុនខ្មែរល្បីៗលំដាប់ប្រទេស និងកីឡាករជើងខ្លាំងគ្រប់ទិសទី ដែលសង្វៀន PNN បានសម្រិតសម្រាំងគូជក់ចិត្តចំនួនប្រាំគូ ក្នុងនោះផងដែងមានការប្រកួតលក្ខណៈមិត្តភាពអន្តរជាតិដ៏កក្រើកចំនួនពីរគូ និងការប្រកួតគុនខ្មែរប៉ះគុនខ្មែរចំនួនបីគូបន្ថែមទៀត។

សម្រាប់ការប្រកួតគូឯក គឺជាការបង្ហាញវត្តមានរបស់អ្នកប្រដាល់មកពីខេត្តត្បូងឃ្មុំ អធិរាជជង្គង់ ឡុង សំណាង នឹងត្រូវត្រៀមស្វាគមន៍ ជើងខ្លាំងថៃ អ៊ិចត្រា ស.ស៊ីរិឡាក់  ក្នុងប្រភេទទម្ងន់ ៦៥គីឡូក្រាម  រីឯការប្រកួតអន្តរជាតិមួយគូទៀតគឺជាការជួបគ្នារវាងខ្លាសរចង្កូមពិសដងទន្លេខេត្តកំពង់ចាម ប៊ុន សុធា ត្រូវស្វាគមន៍ជើងខ្លាំងថៃ វែនថងខាំ ស.កងគៀត ក្នុងប្រភេទទម្ងន់ ៥៧គីឡូក្រាម។

ចំពោះការប្រកួតមិត្តភាពអន្តរជាតិទាំងពីរគូខាងលើនេះប្រព្រឹត្តទៅលើលក្ខន្តិកៈគុនខ្មែរប្រាំទឹក ក្នុងមួយទឹកមានរយៈពេលបីនាទី។ ក្រៅពីគូអន្តរជាតិដ៏ជក់ចិត្តខាងលើនេះ PNN ក៏បានផ្ដល់ឳកាសដល់កីឡាករថ្នាលគុនខ្មែរជំនាន់ក្រោយពោរពេញដោយសមត្ថភាពចំនួនបីគូផ្សេងទៀតដូចជា រឿង ដាណេត មកពីក្លឹបប្រដាល់រឿងសោភ័ណ្ឌគុនខ្មែរ ត្រូវប៉ះ ជិន សីហា មកពីក្លឹបប្រដាល់ឃ្លាំងមឿងកីឡាខេត្តពោធិ៍សាត់ ក្នុងប្រភេទទម្ងន់៥៤គីឡូក្រាម , រីឯ ឌុន អគ្គីនេត មកពីក្លឹបអេភូថងកីឡា ត្រូវប៉ះ ឡៅ រចនា មកពីក្លឹប បញ្ជាការដ្ឋានទ័ពពិសេស ចំណែក សេក សារ៉ាន់ មកពីក្លឹបអង្គរមានជ័យយុទ្ធភូមិភាគទី៤ ត្រូវប៉ះ មិត្ត ចាន់ម៉ើយ មកពីក្លឹបសុភាពគុនខ្មែរ ក្នុងប្រភេទទម្ងន់៥៤គីឡូក្រាម ។

ដែលការប្រកួតដ៏ជក់ចិត្តនេះ នឹងចាប់ផ្តើមចាប់ពីវេលាម៉ោង១រសៀលតទៅ ដោយមានការផ្សាយផ្ទាល់លើកញ្ចក់ ទូរទស្សន៍ PNN ផេកហ្វេសប៊ុក យូធូប  PNN Sports និងផេក Beer Ganzberg ។ អ្នកគាំទ្រក៏អាចអញ្ជើញចូលរួមទស្សនាផ្ទាល់ដោយសេរី នៅស្ថានីយទូរទស្សន៍ ដែលមានទីតាំងស្ថិតនៅខណ្ឌព្រែកព្នៅ រាជធានីភ្នំពេញ ៕

ដោយ៖ ក្រុមកាងារកីឡាPNN