រឿងភាគថៃ ភ្លើងគំនុំ នៅយប់នេះចូលដល់វគ្គរន្ធត់ហើយ ក្រោយកេងបានឃើញភីតស្និទ្ធស្នាលជាមួយព្រែ ធ្វើអោយគេខឹងជាខ្លាំង និងបានគិតថាភីត រួមគំនិតគ្នាជាមួយព្រែបោកប្រាស់់ខ្លួន ប៉ុន្តែរឿងហេតុប្រាកដនោះវាមិនមែនត្រឹមតែជាស្នេហាប៉ុណ្ណោះទេ ប៉ុន្តែនៅមានរឿងជាច្រើនទៀតដែលកេងមិនទាន់បានដឹង។ 

ព្រោះតែកំហឹងមួយឆាវ បានធ្វើអោយកេង ភ្លេចស្មារតីបើកម៉ូតូលឿន រហូតធ្វើអោយជួបគ្រោះថ្នាក់ចរាចរ នឹងបានដឹងដំណឹងថាកេងត្រូវបានស្លាប់ទៅហើយព្រោះតែគ្រោះថ្នាក់ចរាចរនេះ។ ប៉ុន្តែទោះបីជាបែបណា រឿងនេះស្ថិតនៅក្នុងការសង្ស័យនៅឡើយ ព្រោះតែពិធីបុណ្យសពរបស់កេង ប្រាងមិនបានធ្វើពិធីធំដុំអ្វីទាំងអស់ មិនបានអញ្ជើញភ្ញៀវ សូម្បីតែម្តាយក្មេក និងភីតដែលជាសាច់ញាតិក៏មិនអោយមកចូលរួម ថែមទាំងបានដេញអ្នកបម្រើអោយត្រឡប់ទៅផ្ទះអស់ទៀត ដោយគ្មានអ្នកណាម្នាក់បានឃើញសពរបស់កេងឡើយ។ អ្វីដែលគួរអោយចាប់អារម្មណ៍នោះពិធីបុណ្យសពរបស់កេងនៅមិនទាន់បានធ្វើរួចរាល់ផង ប្រាងបានបង្ខំអោយភីតធ្វើឯកសារដើម្បីផ្ទេរភាគហ៊ុនអោយមកខ្លួន។ 

ពេលនេះគ្រប់គ្នាកំពុងសង្ស័យថាតើការស្លាប់របស់កេងពិតឬក្លែងក្លាយ? តើប្រាងអាចនឹងមានល្បិចអ្វីដើម្បីការពារភាគហ៊ុនរបស់ខ្លួនទៀតដែរទេ? បើចង់ជ្រាបច្បាស់ សូមកុំភ្លេចរង់ចាំតាមដានទស្សនារឿង ភ្លើងគំនុំ ចាក់ផ្សាយរៀងរាល់ថ្ងៃចន្ទ ដល់ថ្ងៃព្រហស្បតិ៍ វេលាម៉ោង ៩យប់តទៅ នៅលើកញ្ចក់ទូរទស្សន៍ភីអិនអិន៕ 

ដោយ៖ ម៉ី វ៉ាន់ណែត