សង្វៀន «Ganzberg ONE Strike» បានឈានដល់សប្ដាហ៍ថ្មីទៀតហើយ នាថ្ងៃ អាទិត្យ ទី ២៤ ខែ កញ្ញា នេះ អ្វីដែលកកាន់តែពិសេសកក្រើកទ្វេដងនោះ គឺនឹងមានការប្រកួតលក្ខណៈអន្តរជាតិរហូតដល់ទៅ ៣ គូតែម្ដង ចំពោះបេក្ខភាពជើងខ្លាំងគុនខ្មែរនឹងមានវត្តមានមកប្រជែងប្រាក់លានក្នុងសប្ដាហ៍នេះ មានដូចជា ទាហ៊ានខ្នាយតាន់ ឡៅ ចិត្រា នឹងត្រូវប៉ះដៃគូចាស់កីឡាករថៃ ឌិនណាផូ ស.ថាន់យ៉ាឡាក់ ដែលអ្នកទាំងពីរធ្លាប់ជួបគ្នាម្ដងរួចមកហើយកាលពីឆ្នាំ ២០១៩ ជាលទ្ធផលកាលនោះ គឺស្មើពិន្ទុគ្នា។ រីឯការប្រកួតមួយគូទៀតជាការជួបសងសឹកគ្នារវាង រាជសីហ៍ក្រញាំពិស អេលីត ហុនកង និងអ្នកប្រដាល់អ៊ីរ៉ង់ សាហ៊ូ ហ្គេសារៀន ដែលប្រកួតលើប្រភេទទម្ងន់ ៦៧ គីឡូក្រាម ចំពោះការប្រកួតអន្តរជាតិទាំង ២ គូខាងលើនេះ ប្រព្រឹត្តទៅលើលក្ខន្តិកៈ ONE Strike ដោយប្រើប្រាស់កហ្គង់ចេញម្រាម (MMA Gloves) ដើម្បីដណ្ដើមប្រាក់រង្វាន់ ១ លានរៀលពីស្រាបៀរ ហ្គេនស៍បឺគ បន្ថែមពីលើតម្លៃខ្លូន។

បន្ថែមពីលើនេះទៅទៀតក្នុងសប្ដាហ៍ក៏មានការប្រកួតមិត្តភាពអន្តរជាតិមួយគូផ្សេងទៀតផងដែរ ដោយអ្នកប្រដាល់របស់ក្លិបហ្គឡាក់ស៊ីអេភូថងគុនខ្មែរ ឌុន សុភត់ ត្រូវតទល់ជាមួយជើងខ្លាំងសំបូរស្នៀតមកពីអ៊ូបេគីស្ថាន អាកូបៀហ្គាដូស ដែលប្រកួតនេះធ្វើឡើងលើប្រភេទទម្ងន់ ៦៥ គីឡូក្រាម។

ចំណែកឯការប្រកួតលក្ខណៈមិត្តភាពគុនខ្មែរ ២ គូផ្សេងទៀត គឺអ្នកប្រដាល់មកពីក្លិបប្រដាល់នាយកដ្ឋានអង្គរក្ស អេលីត ប៊ុនទិត្យ នឹងត្រូវប៉ះគ្នាជាមួយ ស៊ុម ខេមរ៉ា របស់ក្លិបប្រដាល់បញ្ជាការដ្ឋានទ័ពពិសេស ក្នុងប្រភេទទម្ងន់ ៥៤ គីឡូក្រាម ចំណែកឯអ្នកប្រដាល់វ័យក្មេង វុទ្ធ រ៉ាវ៉ៃ នឹងត្រូវប្រកួតជាមួយ ស្រួច លីហួរ ក្នុងប្រភេទទម្ងន់ ៦០ គីឡូក្រាម។

សូមបញ្ចាក់ថាការប្រកួតដ៏កក្រើកជក់ចិត្តទាំងនេះ មានផ្សាយផ្ទាល់នៅថ្ងៃ អាទិត្យ ចុងសប្ដាហ៍នេះ ចាប់ពីវេលាម៉ោង ១ រសៀលតទៅ លើកញ្ចក់ទូរទស្សន៍ ភីអិនអិន, ផេកហ្វេសប៊ុក PNN Sports និងទំព័រហ្វេសបុកស្រាបៀរ Ganzberg៕

ទស្សនាវីឌីអូខាងក្រោម៖

ដោយ៖ ឆុន សុខណាង