ថ្ងៃព្រហស្បតិ៍ ទី១៤ ខែ​វិច្ឆិកា ឆ្នាំ២០១៩

ផលតបស្នង​ស្រាយចំណងកម្មបញ្ចប់រឿង ​«​នាងបាប​»

១៣ មិថុនា ២០១៩

រឿងរ៉ាវទុក្ខសោក​ទឹកភ្នែកខកចិត្ត​ព្រោះខុសប្រាថ្នានឹងបញ្ហាផ្សេងៗ​គ្មានបុគ្គលណាម្នាក់ចង់ជួប រឺចង់ឱ្យកើតមានក្នុងជីវិតរបស់ខ្លួនឡើយ តែគ្រប់គ្នាសុទ្ធ​តែគ្មានសិទ្ធប្រកែក ហើយមិនអាចបដិសេធទទួលយកបានឡើយ ដោយសារមានរូបមានរឿង ឯរឿងកើតឡើង គឺត្រូវអនុលោមទៅតាមកម្ម​ដែលខ្លួនបានសាងទុក។ រហូតពេលនេះ ទុក្ខដែលតួអង្គ​គ្រប់គ្នាក្នុងរឿង «នាងបាប» ទទួលបាន ក៏ច្រើនល្មមគ្រប់គ្រាន់​អាចឈានដល់ការបញ្ចប់កម្មរវាងគ្នាហើយ។ អ្នកបានសាងកម្មអាក្រក់ដូចជា ព្រះវណាថេប ទោះចាប់ជាតិជាមនុស្សថ្មី​ក្លាយជាលោក នុ លោកក៏ត្រូវទទួលផលអំពីទង្វើរ​របស់ខ្លួនដដែល។ លោកសាវ៉ា ផ្លាស់ប្តូរដៃគូស្នេហា​តាមចិត្តភ្លើតភ្លើន មិនដែលគិតដល់​ការឈឺចាប់ផ្លូវចិត្ត ការរងទុក្ខវេទនារបស់មនុស្សស្រី ចុងក្រោយក៏ទទួលផល ក្លាយជាមនុស្សប្រុសត្រឹមរូបកាយ តែគ្មានបេះដូងអាចស្រលាញ់​មនុស្សស្រីបានតទៅទៀត។ ឯជីវិតចុងក្រោយក៏ត្រូវរស់ឯកា កង្វល់តែនឹងបញ្ហាគ្មានទីបញ្ចប់ រហូតទ្រាំលែងបាន សម្រេចផ្ញើជីវិតនឹងព្រះធម៌​ជាត្រើយឆ្ពោះរកផ្លូវរំលត់ទុក្ខតែម្តង។


គេថាមនុស្សស្លាប់រស់​ព្រោះចំណងចិត្ត! ពេលនៅកៀកកិតឥតនឹកនា ពេលឃ្លាតពីគ្នា​ទើបនឹកស្តាយ ពេលរស់ជួបជុំពុំខ្វល់ខ្វាយ ពេលបាត់រូបកាយទើបស្តាយក្រោយ។ ឃ្លាទាំងនេះពិតរឺបែបណា? ជឿជាក់ថា រឿងរ៉ាវដែលនាង យុត បានជួបប្រទះ​​អំឡុងពេលចុងក្រោយនេះ​បានស្រាយចម្ងល់ជូនអ្នកទស្សនារួចរាល់ហើយ។ ចំណងដែលនាងមានះចងមិនព្រមស្រាយ ឥលូវវាបានក្លាយ​ជាខ្សែរឹតរួតខ្លួនឯងទុកវិញម្តងហើយ។ ទាំងម្តាយ និងប្អូនស្រីដែលមានសពកប់​តម្រៀបគ្នាជាជួរជាមួយនាង ពួកគេបានចាកចេញទៅ​ចាប់កំណើតនៅកន្លែងផ្សេងគ្នាអស់ហើយ នៅឡើយតែនាងម្នាក់​ដែលត្រូវនៅទទួលកម្មអាក្រក់​ដែលខ្លួនបានសាង រង់ចាំវេលាបញ្ចប់មកដល់។


កូនសុខចិត្តម៉ែក៏សុខដែរ កូនទុក្ខចិត្តម៉ែក្រៀមស្រពោន ក្តីនឿយលំបាកទុក្ខបាត់សូន្យ ពេលបានឃើញកូនជាមនុស្សល្អ! ដោយសារបែបនេះទេដឹង​ទើបនៅទីបំផុតទៅលោក ប៉ាន និងអ្នកនាង រីន ព្រមបើកចិត្តទទួលយកគ្នា ស្របតាមការផ្គូផ្គូង​របស់ចាស់ទុំទាំងសងខាង? គេថារឿងទាំងអស់ក្នុងលោកនេះ តែងកើតឡើងជាគូ ដូច្នេះជីវិតជួបរឿងអាក្រក់​ច្រើនយ៉ាងណា ក៏គង់ជួបរឿងល្អខ្លះដែរ។ ទោះរឿង «​នាងបាប​» ឆ្លុះបញ្ជាំងនូវដំណើររឿងចាក់ស្រេះរវាងបុណ្យបាប កម្ម និងផល កំសត់ ទឹកភ្នែក ខូចចិត្តខ្លាំង​កម្រិតណា ក៏គង់មានឆ្លុះបញ្ជាំង​នូវរឿងរ៉ាវស្នេហាផ្អែមល្ហែមខ្លះ ស្អំចិត្តរបស់អ្នកគាំទ្រដែរ។ ចុងក្រោយការរក្សា​នូវទង្វើរល្អស្មើចុងស្មើដើម បានរុញឱ្យគូស្នេហ៍ ប៉ាន និងរីនជួបគ្នា។


ចង់ជ្រាបច្បាស់អំពីដំណើររឿង «​នាងបាប​» នៅទីបញ្ចប់នឹងប្រែប្រួលក្លាយទៅជាបែបណា សូមកុំភ្លេចរង់ចាំទស្សនា​រឿងនេះភាគបញ្ចប់ នាថ្ងៃសុក្រ ទី១៤ ខែមិថុនា វេលាម៉ោង៦ រហូត​៧យប់។
ទស្សនាសង្ខេបសកម្មភាពពិសេសៗ​នាថ្ងៃបញ្ចប់រឿង៖



ឯកសារយោង៖ អត្ថបទកំណាព្យ «គុណម្តាយ» និពន្ធដោយ ឆោម ច័ន្ទឆាយា

អត្ថបទ៖ កញ្ញា ឃុន វ៉ាន់ដា

Copyright © 2017 PNN TV. All Rights Reserved.