ថ្ងៃច័ន្ទ ទី២២ ខែកក្កដា ឆ្នាំ២០១៩

ពុធ ស្រីខួច៖ «រាល់ឆាកស្និទ្ធស្នាល​នឹងលឹមជាឡាយ​ខ្ញុំប្រឹងថត​ជំនៈ​អារម្មណ៍​រន្ធត់»

២៩ មេសា ២០១៩

កញ្ញា ពុធ ស្រីខួច ជាតួអង្គស្រី​សំខាន់ម្នាក់ក្នុងរឿង «ថ្ងៃមុនស្អប់ ថ្ងៃនេះស្រលាញ់» បាននិយាយសារភាពត្រង់ៗថា ឈុតឱបថើបគ្នា ដែលទទួលបាន​ការចាប់អារម្មណ៍ខ្លាំង​ពីអ្នកទស្សនា​ក្នុងពេលកន្លងមកនោះ គឺនាងប្រថុយប្រថាន​ថតទាំងអារម្មណ៍រន្ធត់។ រន្ធត់ ព្រោះក្នុងបណ្តាចំណោមរឿង​ដែលនាងបានថត​នាពេលកន្លងមក មិនធ្លាប់មានឈុតឆាកណាមួយ​ដែលបង្ហាញអារម្មណ៍​រោលរាល​ផ្អែមល្ហែម​ដល់ថ្នាក់នេះនៅឡើយ។

មុនផ្តើមថតឆាកថើបគ្នា​ជាមួយ លោក លឹម ជាឡាយ នាងបានចំណាយពេល​ប្រមាណមួយម៉ោង លើកហេតុផលនានា​បញ្ចុះបញ្ជូល​អ្នកដឹកនាំរឿង​កែប្រែអត្ថបទរឿង បន្ថយទម្ងន់សកម្មភាព កុំឲ្យមានឈុតថើបគ្នា​កៀកស្និទ្ធខ្លាំងពេក តែចុងក្រោយក៏គ្មានជម្រើស នាងត្រូវតាំងចិត្តធ្វើឲ្យបាន។

កញ្ញាមេធាវី ពៅ បញ្ញា ត្រូវលោក ហួត យុត្ថនា ចាប់បង្ខំធ្វើបាប​នៅផ្ទះចាស់​របស់នាយ ក្រោយចេញ​ពី​ពិធីជួបលៀងរួមគ្នា (សាច់រឿងក្នុងភាគទី១០)

តារាស្រី ពុធ ស្រីខួច បានរៀបរាប់​អោយដឹងបន្ថែមទៀត៖ «ចង់ឲ្យខាងអ្នកដឹកនាំ​ដូរពីការចាប់ថើប ហើយត្រូវទៅ​ចាប់ឱប​តួប្រុសពីក្រោយទៀត! និយាយរួម! ពេលហ្នឹងគឺដាក់មនោសញ្ចេតនា​ទៅតួប្រុសខ្លាំង​មែទែនហ្មង! ព្រោះមនុស្សមិនដែលស្គាល់គ្នាសោះ ស្គាល់តាមតែការងារសិល្បៈ ប៉ុន្តែមិនដែលមានមនោសញ្ចេតនា​ខ្លាំងជ្រាលជ្រៅទេ ដល់ពេលទៅចាប់ថើបគេចឹង និយាយទៅខ្ញុំស្រងាកខ្លួនឯងដែរ!”។

តបនឹងសំណួរ​បើពិបាកសម្តែងខ្លាំងបែបនេះ តើមានមូលហេតុអ្វី​ធ្វើឲ្យនាងអាចពុះពារ​ឧបសគ្គសម្តែងបាន? តួឯកស្រី ពៅ បញ្ញា នាងថា ព្រោះអ្នកនាង​ចង់សាកល្បងខ្លួនឯង ចង់ទទួលបានបទពិសោធថ្មី​ក្នុងការងារជាអ្នកសម្តែង ហើយម៉្យាងនាង​មិនចង់ឲ្យអ្នកគាំទ្ររឿងភាគខ្មែរ «ថ្ងៃមុនស្អប់ ថ្ងៃនេះស្រលាញ់» ខកចិត្តឡើយ។ ក្រៅអំពីឈុតថើប ក៏មានឆាក​ជាច្រើនទៀត តម្រូវឲ្យតួ លោក ជាឡាយ ចាប់ទាញកន្ត្រាក់ ក្រវាត់ និងឱបតួស្រី​ដោយឥតព្រាងទុកច្រើនទៀត។ ឈឺសាច់ក៏ឈឺ ស្អប់ខឹង ប្រច័ណ្ឌច្របូកច្របល់គ្នា តែស្រីខួចនាងនៅតែបញ្ជាក់ ខ្លួនបានតាំងចិត្ត​ធ្វើអស់សម្ថភាពហើយ។

ចង់ដឹងច្បាស់ថា កញ្ញា ពុធ ស្រីខួច នាងពិតជាប្រឹង​អស់លទ្ធភាព​ក្នុងការសម្ដែងរឿង «ថ្ងៃមុនស្អប់ថ្ងៃនេះស្រលាញ់» មែនរឺយ៉ាងណា? តើរឿងភាគខ្មែរ​ដ៏ល្អប្រចាំឆ្នាំរបស់PNN ល្អមើលដល់កម្រិតណា? សូមកុំភ្លេចរង់ចាំទស្សនា​ការផ្សាយតាមរយៈទូរទស្សន៍ នាវេលាម៉ោង៨យប់ រហូតម៉ោង៩យប់ រៀងរាល់ថ្ងៃច័ន្ទ ដល់ថ្ងៃពុធ។

អត្ថបទ៖ កញ្ញា ឃុន វ៉ាន់ដា

Copyright © 2017 PNN TV. All Rights Reserved.