ថ្ងៃអង្គារ៍ ទី២៣ ខែមេសា ឆ្នាំ២០១៩

ភីអិនអិន​នឹងចាត់វិធាណការណ៍ក្តៅ​លើការផ្សាយរឿង​ភាគធំ​របស់ខ្លួន​ដោយគ្មាន​ការអនុញ្ញាត្តិ

១៩ មីនា ២០១៩

នៅចំពេលដែលប្រលោមលោក «ថ្ងៃមុនស្អប់ថ្ងៃនេះស្រលាញ់» នឹងចាក់ផ្សាយជារឿងភាគ​រស់រវើកនៅយប់ថ្ងៃអង្គារ៍នេះ ទូរទស្សន៍ភីអិនអិន​ បានប្រកាសចាត់វិធានការណ៍ម៉ឺងម៉ាត់​ក្នុងការប្រឆាំងទៅនឹង​ការលួចចម្លងផ្សាយនានា​ដែលមិនមានការអនុញ្ញាត្តិ។

កញ្ញាទូច បុប្ផា ប្រធានផ្នែកកម្មវិធីផ្សាយ​នៃទូរទស្សន៍ភីអិនអិន​មានប្រសាសន៍ថា «ភីអិនអិននិង Soyo បាននឹងកំពុងរឹតបន្តឹង​ការឃ្លាំចាប់សំអាត​រាល់ការចាក់ផ្សាយដែលគ្មានការអនុញ្ញាត្តិ មិនត្រឹមតែធ្វើអោយ​ធ្លាក់គុណភាពរឿង ថែមទំាង ជាន់ពន្លិចការត្រដរងើបឡើងវិញ​របស់រឿងភាគខ្មែរ។

កាលពីសប្តាហ៍មុន ទូរទស្សន៍ភីអិនអិន​បានដាក់សម្ពោធរឿងភាគខ្មែរ «ថ្ងៃមុនស្អប់ថ្ងៃនេះស្រលាញ់» ដើម្បីបង្អួតឈុតឆាក​បច្ចេកទេសភ្លើងនិងកាម៉េរ៉ា Movement ដ៏ទំនើបរបស់ខ្លួន ថែមទុករឿងភាគនេះថាជាភាពយន្ត ធំប្រចាំឆ្នាំរបស់ខ្លួនទៀត។

ថ្លែងនៅក្នុងពិធីនោះ លោកវ៉ែន សំកុល មកពីខាង Soyo បានអះអាងថា  «នេះជារឿងភាគដំបូងដែល Soyo ចំណាយប្រាក់លើអនឡាញយ៉ាងធំ ស្មើនឹងទំហំផលិតកុនបញ្ចាំងតាមរោងបាន ហើយអះអាងថារាល់ការចេញផ្សាយ​តាមអនឡាញក្រៅពីលើ Soyo ជារឿងល្មើសច្បាប់»។

ភាពយន្តភាគដែលឆ្លុះបញ្ចាំង​អំពីមនោសញ្ចេតនា​មិត្តភាពយូរអង្វែង ការភ័ន្តច្រលំដោយអស្មិមានះ និងតម្លៃនៃគុណធម៌​ឈរពីលើផលប្រយោជន៍ត្រូវបាន​អ្នកសារព័ត៌មាននានា​ដែលចូលរួមក្នុងការសម្ពោធ​ទទួលស្គាល់ថាពិតជាមាន គុណភាពថ្មី ខុសពីរឿងខ្មែរនានាក្នុងពេលបច្ចុប្បន្ន។

លោកខុត សីហា អ្នកសារព័ត៌មានមួយរូប​បានបញ្ជាក់ដូច្នេះថា៖ «កុនខ្មែរយើងគិតពីភាព​ស្រដៀងគ្នាជាមួយថៃ គឺមានទះតប់រវាងស្រីៗ ប្រទាញគ្នារឿងតួប្រុស តែចេញឃ្លីបម្ភៃនាទីនេះភ្លាម យើងមានអារម្មណ៍ប្លែកហើយគិតថា កុននេះមិនយឺត មិនភ្លាវ មិនមានសំឡេងញែកបញ្ចូលពីលើ ហើយថែមទំាងមានខ្លឹមសារ​ជក់ចិត្តដិតអារម្មណ៍»។

ទូរទស្សន៍ភីអិនអិន បានទទួលសិទ្ធិផលិតរឿង​ប្រលោមលោកដ៏ល្អនេះ ដែលជាស្នាដៃអ្នកនិពន្ធខ្មែរពិតៗ ចំណែកផលិតកម្ម​ដែលបានសិទ្ធិដឹកនាំការថតគឺ Lafilm។ ដោយឡែកសម្រាប់អ្នកគាំទ្រ​កំពុងតែទន្ទឹងរង់ចាំ​ការចេញផ្សាយភាគទីមួយនៅយប់នេះ ចាប់ពីម៉ោង១៩និង៥០នាទី រវាងពីថ្ងៃចន្ទ ដល់ ថ្ងៃពុធ នៅលើកញ្ចក់ទូរទស្សន៍ភីអិនអិន៕ 

ទស្សនាទិដ្ឋភាពក្នុងពិធីសម្ពោធរឿង «ថ្ងៃមុនស្អប់ថ្ងៃនេះស្រឡាញ់» ខាងក្រោម៖ 

Copyright © 2017 PNN TV. All Rights Reserved.