ថ្ងៃអង្គារ៍ ទី២១ ខែឧសភា ឆ្នាំ២០១៩

Pnn មានមោទនភាព​ចំពោះ «ថ្ងៃមុនស្អប់ថ្ងៃនេះស្រលាញ់»

២១ កុម្ភៈ ២០១៩

ថ្មីៗនេះស្ថានីយទូរទស្សន៍ភីអិនអិន​បានបញ្ចេញសមិទ្ធិផល រឿងភាគខ្មែរថ្មីមួយគឺ រឿង «ថ្ងៃមុនស្អប់ថ្ងៃនេះស្រលាញ់» ក្រោយថតចប់រួចរាល់​ដោយប្រើរយៈពេល​ពេញមួយឆ្នាំ។
នៅក្នុងវីដេអូមួយនេះ ស្ថានីយទូរទស្សន៍ Pnnចាត់ទុក រឿង «ថ្ងៃមុនស្អប់ថ្ងៃនេះស្រលាញ់» ជាខ្សែវីដេអូភាគធំ​របស់ខ្លួនប្រចាំឆ្នាំ២០១៩។

កញ្ញាទូច បុប្ផា ប្រធានគ្រប់គ្រង​កម្មវិធីទូរទស្សន៍​បានបរិយាយថា ដោយសារ PNN តែងតែគាំទ្រស្នាដៃ​របស់អ្នកនិពន្ធខ្មែរ ម្ល៉ោះហើយ​ស្នាដៃប្រលោមលោក​របស់អ្នកនិពន្ធ ម៉ី សនសុធារី ដែលមានឈុតឆាក​ល្អៗច្រើន ទំាងផ្នែកពាណិជ្ជកម្ម បទពិសោធន៍ជីវិត​និងមនោសញ្ចេតនាទន់ភ្លន់ ត្រូវបានជ្រើសយកមកផលិត។ កញ្ញាកត់សម្គាល់ឃើញថា ខាងផលិតកម្មបានបង្ហាញ​នូវលទ្ធផលល្អប្រសើរ​សម្រាប់រឿងមួយនេះ។

អ្នកផលិតរឿងនេះគឺ លោក ឈរ ហ្សង់ ជាខ្មែរសញ្ជាតិបារាំង​មកពី ផលិតកម្ម La film បានអះអាងថា​លោកបានប្រើវិធីសាស្ត្រថ្មី គឺអោយតារាសម្តែង​លេងតាមគំនិតនិង
មនោសញ្ចេតនា​របស់គេផ្ទាល់ហើយកាមេរ៉ា​គឺនៅចាំចាប់រហូត​មិនកាត់ពួកគេ ជាហេតុធ្វើអោយពួកគេ​ចូលតួបានល្អ​និងមានកាយវិការស់រវើក។

អ្នកនិពន្ធ ម៉ី សនសុធារី វិញក៏បានអះអាងដែរថា អ្នកស្រីមានមោទនភាព​ចំពោះរឿងភាគមួយនេះដោយបាន បន្តសាច់រឿងថ្មីបន្ថែមខ្លះពីលើរឿងចាស់​ដើម្បីអោយកាន់តែមានភាពទំនើបកម្ម​និងដើរទាន់បច្ចុប្បន្នភាព​របស់សង្គមកម្ពុជា។ អ្នកស្រីអះអាងថា​យើងថតកុនយើងដើរទៅមុខ​មិនមែនបកក្រោយទេ ដូច្នេះលំបាកឬស្រណុក វាជារឿងធម្មតា បើបកក្រោយគួរតែមិនធ្វើល្អជាង។

ចំណែកអ្នកនិពន្ធ​អត្ថបទភាពយន្តគឺ កញ្ញាម៉ានិត បានអះអាងដែរថា សាច់រឿងបំឡែងពីប្រលោមលោកមួយនេះ​ត្រូវការពេល៥ខែគត់​ក្នុងការសរសេរឡើងវិញ ហើយថាខ្លួនបានរៀនច្រើន​ពីសិល្បៈកំណត់ចរិតតួអង្គ​ក្នុងរឿងដ៏ល្អនេះ។

លោកលៀក លីដា ផលិតករដ៏មានបទពិសោធន៍ ដែលជាទីប្រឹក្សា​សម្រាប់ខ្សែរឿងភាគនេះ​អះអាងថា នេះជាសាច់រឿងដំបូង​ដែលលោកស្រលាញ់អស់ពីបេះដូង។ រឿងភាគថ្ងៃមុនស្អប់ ថ្ងៃនេះស្រលាញ់​ក៏នឹងមានផ្សាយបន្តនៅលើ Soyoផងដែរដែល លោកស៊ុត ឈាងឡេង អ្នកគ្រប់គ្រង Soyo អះអាងថា នេះជាកុនដែលមានតម្លៃ Digital Right ខ្ពស់បំផុតក្នុងឆ្នាំនេះ៕

Copyright © 2017 PNN TV. All Rights Reserved.